Прокурор «Қазақтың Робин Гуды» Ілияс Сариев пен оның серіктесін 6 жылға бас бостандығынан айыруды сұрады

Ілияс Сариевке қатысты сотта бүгін күтпеген айыптар ашылды: қажылыққа барған ондаған адамның ақшасы төленбей қалғаны, қарыздардың гидтердің қалтасынан өтелгені ғана емес, Сариевтің компания шотынан қаражатты қайтармай алғаны және құмар ойынға миллиондап ақша тіккені туралы куәгерлер ашық айтты. Прокурор енді Сариев пен Ақтоты Дүйсееваны 6 жылға бас бостандығынан айыруды сұрады деп хабарлайды Orda.kz.

Ілияс Сариев пен Ақтоты Дүйсееваның бүгінгі сот отырысында куәгерлер сұралды. Бірінші болып ММTravel-дің Мекке мен Мединаға апаратын гидінен жауап алынды. Куәгер Рашид Ахметқалидің айтуынша, ол компанияда гид болып істесе де, қолында жұмысқа қатысты ешқандай келісімшарт болмаған. Әр барған сапарға 150 мың теңгеден Ақтоты Дүйсеева оның банк қосымшасына аударып отырған. Қажылыққа әр сапарда шамамен 40-50 адам барып отырған екен.

«Наурыз айында осы жылдың шамамен 60 адам келді қажылыққа. Мен оларды Медина қаласынан күтіп алдым да, қонақүйге апардым. Барсақ, ешкімнің ақысы толық төленбеген екен. Мен Ақтотыға хабарластым. Кешке дейін күттік, ол маған екі күнге 60 адамның қонақүйіне қажетті ақшасын шотыма аударды. Содан ары қарай екінші қалаға барарда автобустың да ақшасы төленбеген. Оны өз қалтамнан сол жерде төледім. Ары қарай тағы да ол жақта да қонақүйдің ақшасы төленбеген соң, ең арзан қонақүй тауып бердім. Ары қарай оған да ақшаларын төлемей, ол 140 мың теңгені Сариев салып жіберді. Ақырында 60 адаммен қоса, мен де қайтарға билетті өз ақшамызға алып қайттық», – деді Ахметқали.

Екінші куәгер Нұрсұлтан Ғазиев 2022 жылдан бастап жұмыс істеген: бастапқыда мобилограф болып кіріп, кейін гид қызметіне ауысқан. Ол компания ашылғанда қажылыққа баратын компанияны Сариев пен Дүйсеева бірге ашқанын айтты. Оның айтуынша, 2024 жылдың соңына қарай компанияда қаржы жетіспеушілігі жиілегендіктен жұмыстан шыққан. Компанияда осыған қатысты жиі жанжал болып тұрған. Сонымен қатар, компанияда 10-ға жуық адам жұмыс істеген.

«Ақшаның үнемі жетіспеуі осы Сариевтің кесірінен болды. Мен сол компанияда істеген соң ішкі жағдайды білемін. Сол кезде Сариевтің компания шотынан жиі алып, орнына қоймағанын Ақтоты айтып жүрді. Есепшот Ақтотының атына ашылғанмен, ол есепшот тіркелген телефон және барлық қаржы, тіпті қайырымдылық қорына жиналған ақша да осы Сариевтің қолында болатын», – деді Ғазиев.

Ал үшінші куәгер Әділет Жақсылықовқа Сариев тойға шығатынын айтып, әндерін жазып әрі бейнебаянын түсіруге көмектесіп жүрген кезде оның қосымшасы арқылы Сариев миллионға дейін құмар ойындарға ақша тігіп жүргенін жайып салды. 

«Ілиястың құмар ойын ойнағанын көрдім, себебі ол футболға ақша тігу үшін менің қосымшамды пайдаланып, менің атымнан бір-екі рет ақша тіккен болатын. Нақты сомасы есімде жоқ, шамамен айтар болсам, миллионға дейін тіккен ақша. Ол кезде Сариев жеңіліп қалды. Мен де арасында қасымдағы достарыммен ақша тігемін, бірақ ол сияқты миллионға дейін ақша тіккен емеспін. Ол алдымен өз шотынан маған ақшаны аударып, артынан менің қосымша арқылы тігіп отырды. Мен оның қасында бір жарым жыл жұмыс істедім. Бастапқыда біз Сариевке сендік, себебі қайырымдылық қоры болды, қолынан тасбиғы түспеген соң сендік. Оның мұндай әрекеттерге барғанын көріп, шок болдық», деді Жақсылықов.

Сонымен қатар, сотта Сариев бір жәбірленуші Төреиеваға 800 мың теңге ақшасын қайтарып бергені айтылды. Алайда оған кешірім бермейтінін айтты.

Сондай-ақ, куәгерлерден жауап алынып болған соң прокурор іс бойынша дәлел мен дәйекті қорытындылап, екі күдіктіге 6 жылға бас бостандығынан айыру жазасын тағайындауды сұрады. 

«Сариев Ілияс пен Ақтоты Дүйсееваны Қылмыстық кодекстің 190-бабының 3-бөлігі, 4-тармағы бойынша кінәлі деп танып, 6 жылға бас бостандығынан айыруды сұраймын. Сонымен қатар, оларды жазасын орташа қауіпсіздік мекемесінде өтеуге жіберуіңізді сұраймын. Жәбірленушілердің азаматтық талап-арызын қанағаттандыруды, оларға өтемақы ретінде 20 АЕК мөлшерінде мәжбүрлі төлем өндіруді сұраймын», – деді прокурор.

Келесі сот отырысы 4 желтоқсанға жоспарланды. Енді жарыссөзбен үкім қалды. Orda.kz сот отырысынан ақпарат таратуды жалғастырады.