Прокурор Хасан Қасымбаевқа 15 жыл сұрады

Талғар қаласында Хасан Қасымбаев пен өзге де айыпталушылардың ісі бойынша сот жалғасуда. 28 қазан күні өткен отырыста тараптар сөз жарыстырды, деп хабарлайды Orda.kz.

Айыпталушылар прокурордың айтқандарымен келіспей, істегі айыптауларды «жалған және ойдан құрастырылған» деп мәлімдеді.

Мемлекеттік айыптаушы Ерлан Құланбаев Қасымбаевқа 15 жыл бас бостандығынан айыру жазасын сұрады. Сондай-ақ айыпталушылардан жәбірленуші тарапқа бес миллион теңге моральдық өтемақы өндіруді ұсынды.

2024 жылдың 2 қарашасында Хасан Қасымбаев уақытша ұстау изоляторына қамалды. Тергеу нұсқасы бойынша, ол 2021 жылы ережесіз жекпе-жек жаттықтырушысы Арман Әлімовті ұрлап кетіп, қасақана ауыр дене жарақатын салған. Сонымен бірге, оған 2016 жылы Аюпжан Тәжиевке қатысты оқиға бойынша да айып тағылған.

Бұл іс бойынша Қасымбаевтан бөлек тағы бес адам айыпталуда: Руслан Әлиев, Мадияр Қалымжанов, Сайлау Ақтанов, Нұрмұхаммет Сұлтанбеков және Данияр Асқаров.

Сот залында айыпталушылар өз құқықтарының бұзылып жатқанын айтып наразылық білдірді. Ал жәбірленушінің анасы үш күдіктіге қатысты іс қозғалмағанын айтып, апелляциялық шағым түсіретінін хабарлады.

Айта кетейік, бұл отырысқа журналистер қатыстырылды.