Президентіміз су басқан аймақтың тұрғындарымен тілдесіп қайтты

Қасым-Жомарт Тоқаев БҚО-дағы Қаратөбе ауданындағы эвакуциялық пунктке барып қайтты, деп хабарлайды Orda.kz порталы Ақордаға сілтей отырып.

Президент гуманитарлық көмекті тарататын пункт жұмысымен танысып, кейін су тасқынынан зардап шеккен жақын маңдағы ауылдардан көшірілген тұрғындармен жолықты.

Қасым-Жомарт Тоқаев бұндай су тасқыны елде мүлдем болмағанын, тек осыған ұқсас жағдай 1994 жылы болғанын және бұл су тасқыны одан да асып түскенін мәлімдеді.

«Хал-жағдайларыңызды білу үшін арнайы келіп отырмын. Бұл - бұрын-соңды болмаған үлкен табиғи апат. Сондықтан бәріміз бір ел, бір халық болып әрекет етуіміз керек. Мемлекет, Үкімет баршаңызға қол ұшын береді. Материалдық, қаржылық көмек көрсетеді. Оған еш алаңдамаңыздар. Бәрі дұрыс болады», – деді Президент.

Президентпен кездесуде жергілікті тұрғындар Жақсыбай және Қалдығайты өзендеріне көпір салып беруді және ауыл маңайындағы бөгеттерді жаңартуды сұрады.

Үкімет басшысы бұл  жағдай туралы Үкіметке тиісті тапсырма беретінін атап өтті. Сондай-ақ тасқын суды шаруашылыққа пайдалану керек екенін де тілге тиек етті.