Президент су тасқынына байланысты тапсырмалар берді

Қасым-Жомарт Тоқаев алдағы су тасқынының алдын-алу мақсатында Республикалық штаб пен Үкіметке айрықша тапсырма берді, деп хабарлайды Orda.kz порталы.

«Көктем мезгілінде қар шығару,  өзендердің қауіпті учаскелеріндегі мұзды жару, қарғын су жүретін арналар жасау және басқа да қажетті шаралар алдын ала жүргізілуге тиіс. Жаз-күз маусымында өзен арналарын уақтылы тазалауды, табанын тереңдетуді және сағаларын кеңейтуді, автомобиль мен теміржолдардың бойындағы қолданыстағы су өткелдерінің қуаттылығын арттырып, жаңасын салу  қажет. Қорғаныс бөгеттері мен су жүретін каналдар салу керек. Бұл міндет Республикалық штабқа және Үкіметке жүктеледі», – деді Мемлекет басшысы.

Айта кетейік, бүгін Қасым-Жомарт Тоқаев Батыс Қазақстан облысына барып, су тасқынына байланысты жедел штаб отырысын өткізген болатын.

«Қазір тиісті мекемелердің бәрі белсенді жұмыс істеп жатыр.  Бірқатар аймақты қарғын су басып қалды. Кейбір жерде тасқын су көтеріліп жатыр. Бұл – табиғи апат. Қысқасы, алдымызда тұрған жұмыс өте ауқымды. Бәріміз бір ел, бір ұжым болып осы апатты еңсеруіміз керек. Басқа жол жоқ. Тасқын су салдарын жою үшін нақты шаралар қолға алынды. Қауіп-қатердің алдын алу жұмыстары атқарылуда. Менің тапсырмам бойынша облыс әкімдері жұмысқа белсенді кірісті», – деді Президент.