Президент бокстан Әлем кубогының жеңімпаздарын құттықтады

Қазақстан президенті Қасым-Жомарт Тоқаев Астанада өткен бокстан Әлем кубогының финалдық кезеңін тамашалап, ұлттық құраманың жеңісімен құттықтады, деп хабарлайды Orda.kz.

Жекпе-жектер елорданың Жақсылық Үшкемпіров атындағы жекпе-жек сарайында өтті. Рейтингтік мәртебесі бар турнирге 29 елден 250-ге жуық спортшы қатысты. Оның нәтижелері алдағы Олимпиада ойындарына іріктеу процесіне әсер етеді.

Жарыс қорытындысы бойынша Назым Қызайбай, Махмұд Сабырхан және Бекзат Нұрдәулетов алтын медаль жеңіп алды. Күміс жүлде Нұрбек Оралбайға бұйырды. Бұған дейін Сағындық Тоғамбай, Аида Әбікеева және Айдана Забынбекова қола жүлде иеленген болатын.

Финалдық бәсекеден кейін Президент Қасым-Жомарт Тоқаев ұлттық құраманың спортшыларымен кездесіп, алғысын білдірді.

«Жеңістеріңіз құтты болсын! Бокспен тек мықты, күш-жігері мол адамдар шұғылданады. Бұл – ерекше спорт. Баршаңызға сәттілік тілеймін. Мемлекет әрқашан сіздерді қолдайды. Қазақстанда бокстың келешегі зор болатынына ешқандай күмәнім жоқ», — деді мемлекет басшысы.

Айта кетейік, бұған дейін әйелдер құрамасы бокстан әлем чемпионатында тарихи нәтиже көрсетіп, үш алтын, екі күміс және бір қола медаль жеңіп алған еді. Жалпы есепте 35 жекпе-жектің 26-сында жеңіске жеткен ұлттық құрама өз тарихындағы ең жоғары көрсеткіштердің біріне қол жеткізді.