Павлодарда көлік ұрлап қашқан ер адам апатқа ұшырап, оқиға орнында көз жұмды

Павлодарда белгісіз ер адам «Mercedes» маркалы көлікті айдап қашып, бағдаршамда тұрған автокөліктерге соғылды. Қатты соққыдан ол оқиға орнында қаза тапты, деп хабарлайды Orda.kz.

Жол апаты салдарынан тағы екі көлік зақымданды. Барлығы бес адам, оның ішінде екі бала түрлі жарақат алған.

Алдын ала мәлімет бойынша, ер адамның мас күйде болғаны айтылады. Қазіргі таңда оқиғаға қатысты тергеу басталды. Полиция ұрлық және адам өліміне әкеп соққан жол қозғалысы ережелерін бұзу фактілері бойынша қылмыстық іс қозғағанын хабарлады.