Павлодарда қараусыз қалған 5 жасар баланың ата-анасы табылды

Павлодар тұрғындары көпқабатты үйдің ауласында қараусыз қалған 5 жастағы баланы байқаған. Бүлдіршіннің ата-анасы табылды, деп хабарлайды Orda.kz.

Павлодарлықтар 6 сәуір күні полицияға хабарласып, қараусыз баланың жүргенін айтқан. Көп өтпей баланың ата-анасы табылды. 5 жастағы Әлидің отбасы қалаға бес күн бұрын көшіп келген. Көп балалы ата-ананың 8 баласы бар екен. Әкесі түнгі ауысымда жұмыс істесе, анасы үйде жұмыссыз отырған көрінеді. Ер адам 5 жастағы баласын бауырлары сияқты ұйықтап жатыр деп ойлаған. Алайда ата-ана баланың жоғалғанын байқап, полицияға арыз жазған. Бала тек тәжік тілінде сөйлейтіндіктен, полицейлерге қайда тұратынын түсіндіре алмапты. 

Көп балалы ата-анаға перзентіне дұрыс қарамағаны үшін айыппұл салынады. Олардың мінез-құлқын кәмелетке толмағандардың істері жөніндегі комиссия қарайды. 

Еске салайық, Павлодар облысында мемлекеттік тұрғын үйді бөлу кезінде бірқатар заң бұзушылықтар анықталды.