Павлодарда бас есепші мен директор 63 млн ақша жымқырған

Павлодарда балабақша директоры мен бас есепші ақша жымқырғаны үшін сотталды, деп хабарлайды Orda.kz порталы.

Директор мен бас есепші 7 жыл бойы төлемдерді заңсыз өз пайдасына есептеп, міндетті зейнетақы жарналары мен міндетті әлеуметтік медициналық сақтандыруға аудармалар жасап отырған.

«Осылайша қаскөйлер мемлекетке жалпы сомасы 63 млн теңгеге жуық материалдық шығын келтірді. Сот оларды ҚР ҚК-нің 189-бабымен (сенiп тапсырылған бөтен мүлiктi иемденiп алу немесе талан-таражға салу) көзделген қылмыс жасағаны үшін кінәлі деп тауып, жеті жыл мерзімге бас бостандығынан айыру жазасын тағайындады» делінген хабарламада.

Бұрынғы балабақша директоры Абай облысы ҚАЖД-ға қарасты № 23 мекеменің карантин бөлімшесінде жазасын өтеуді бастады. Сотталған азамат өз кінәсін толығымен мойындады және жәбірленушілерге келтірілген борыштың бір бөлігін төледі.

«Ал бұрынғы есепшіге қатысты, сот оның бес жасар қызы бар екенін ескеріп, бес жыл мерзімге бас бостандығынан айыру жазасын өтеуді кейінге қалдырды»,—дейді мекеме бастығының орынбасары Анар Сәбиева.