Пәкістандағы лаңкестік әрекеттен 50-ден астам адам қаза тапты

Жарылыс болған кезде адамдар мешітке жұма намазына жиналып жатқан. 50-ден астам қаза тауып, 100-ден астам жараланғаны хабарланды. 

Пәкістанның Белуджистан провинциясындағы мешіттің жанында жарылыс болды. Бұл туралы The Dawn хабарлады. Оқиға Мастунг қаласында Мәуліт мерекесі – Мұхаммед пайғамбардың туған күнін тойлауға арналған намазға жиналғандар арасында болды. 

Бірінші жарылыстан кейін артынша екінші жарылыс болды. Кейін белгілі болғандай, шабуылды жанкешті жасаған, оның аты-жөні белгілі болды.

100-ден астам жаралы адамдардың ауруханаларға жеткізілгені белгілі. Адамдардың жағдайы ауыр, кейбіреулері жансақтау және травматология бөлімшелеріне ауыстырылуда.

Болған оқиға үшін жауапкершілікті әзірге ешкім өз мойнына алған жоқ. Дегенмен, Пәкістанда тыйым салынған кейбір ұйымдардың  бұған қатыстылығы жоққа шығарылды.

Белуджистанның бас инспекторы Абдул Халиқ Шейх биліктің болашақта мұндай лаңкестік әрекеттердің алдын алу шараларды бастағанын айтты.