Олимпиадалық резерв мектебінің оқушысы қайтыс болғаннан кейін екі оқушы қамауға алынды

Ақтөбедегі Есет батыр атындағы спорт мектебі оқушысының өліміне байланысты полиция үш қылмыстық іс қозғады.

Бұл туралы Orda.kz тілшісі хабарлайды.

Бұзақылық және адам өліміне әкеп соқтырған қасақана денсаулыққа ауыр зиян келтіру, сондай-ақ қызметтік міндеттерін адал орындамағаны үшін мұғалімдер мен спорт мектебінің басшылығына қатысты тергеу амалдары жүргізілуде.

Қазір бұл мектептің екі оқушысы қамауға алынып, уақытша ұстау изоляторына қамалды. Сотқа дейінгі тергеу амалдары жалғасуда.

Естеріңізге сала кетейік, 11 сәуір күні сағат 21:30 шамасында Есет батыр атындағы облыстық олимпиадалық резервтегі мамандандырылған мектеп-интернат-колледжінде сегізінші сынып оқушысының құлап, есінен танып қалғаны туралы хабарлама түскен болатын. Бала ауруханаға жетпей жедел жәрдемде қайтыс болды.