«Олар кеседі, ұрады, қорқытады»: Шымкентке тоқырау кезіндегі 90-шы жылдар оралды

Шымкентте бір топ адам жергілікті тұрғынды ұрлап, зәбір көрсеткен. Ауыр жарақат алған ол ауруханаға жеткізілген соң, полицияға жүгінген. Бір жарым ай өтсе де, қаскөйлер әлі де бостандықта әрі байланыстары арқылы қорқытуды жалғастырған. Үмітін үзген Руслан Orda.kz редакциясына жүгінген.

Русланды (есімі өзгертілді) қаңтардың соңында ұрлап кеткен. Қылмыс бейнебақылау камераларына түсіп қалған. Жазбалардан бірнеше ер адам оны көлікке күштеп отырғызып, белгісіз бағытқа алып кеткені көрінеді.

Бұл оқиғаны баяндаған кезде, Руслан қатты қобалжыды. Ол шынайы үрей сезінгенін айтады, мұның бәрі оған 90-шы жылдардың беймәлім кезеңін еске салған.

Руслан досымен бірге кафеде отырған. Бір сәтте мас жігіттермен ауызша жанжал басталып, төбелеске ұласады. Кафе әкімшісі бірден полиция шақырып, жанжалды тоқтатты. Алайда, қиындық  енді ғана басталған еді.

«Кафе әкімшісі полиция шақырған кезде олар алаңдай бастады. Мен досымды ертіп, артық мәселе тумас үшін басқа орынға баруды ұйғардым. Біз басқа жаққа барып, демалуды шештік. Сыртқа шығып, темекі шеккелі тұрғанда, бағанағы жігіттердің бірі сол жерде тұрғанын байқадық. Бірнеше минуттан кейін қара джип келді. Ішінде төрт адам болды, олар өте жылдам әрі ұйымдасқан түрде әрекет етті – арнайы жасақ сияқты», – деп еске алады Руслан.

Барлығы көз ілеспес жылдамдықпен болды, бұл алдын ала жоспарланған қамауға көбірек ұқсады. Руслан қарсылық көрсеткеніне қарамай,  оны бүйрегінен ұрып, байлап, көлікке салып әкетті.

«Олар мені жерге жығып, ұра бастады. Содан кейін айналма жолға апарып, көліктен шығарып, қайта соққыға жықты. Жан-жақтан төпеп ұрды. Бір сағаттай есімнен танып, ес-түссіз жаттым. Бір кезде олардың бірі пышақ шығарып, басымды кесіп аламын деп қорқытты, бірақ оны тоқтатты. Бірақ бәрібір құлағымды кесіп тастады – біреуі басымды ұстап тұрды, екіншісі кесуге кірісті. Мені ұстаған адамның кім екенін таныдым, оның атын полицияға бердім, бірақ ол әлі күнге дейін бостандықта жүр», – деді Руслан.

Руслан қай жерде екенін түсінбей, таң ата есін жияды. Ауыр жарақат алды –  қабырғалары мен бет сүйектері сынған, кесілген құлақ өз алдына. Ол  ауруханаға барып, дереу полицияға арыз жазған. Оған сегіз адам жабылған.

«Мен олардың мұндайды бірінші рет жасап тұрмағанын естідім. Бірден ойыма олардың бұрынғы немесе қазіргі құқық қорғау қызметкерлері болуы мүмкін деген ой келді. Олар бастапқыда-ақ менің ештеңе істей алмайтынымды, үлкен байланыстары бар екенін айтты. Маған емделуге ақша ұсынды, арызды қайтарып алуды сұрады». 

Руслан ауруханада жатқан екі апта ішінде шабуылдаушылар бірнеше рет келіп, арызын қайтарып алу үшін қысым көрсеткен. Медициналық сараптама оның жарақаттарын «орташа ауыр» деп бағалаған, алайда Руслан бұл қорытындымен келіспейді. Оның айтуынша, сараптама пышақ қолданылғанын және өміріне нақты қауіп төнгенін ескермеген.

Бір жарым ай өтті. Руслан әлі де емделіп жүр. Басы қатты ауырады, сүйегі сыздайды. Ол ем-домға қомақты қаражат жұмсағанын, тергеудің тым баяу жүріп жатқанын айтады.

Шымкент полициясы Orda.kz-ке қылмыстық іс қозғалғанын хабарлады.

«Тергеу барысында барлық қатысушылар анықталып, полицияға жеткізілді. Күдікті қамауға алынды. Қазіргі уақытта қылмыстық іс сотқа жолдау сатысында»,  деп хабарлады полиция департаменті.

Алайда қандай бап бойынша тергеу жүріп жатқаны туралы полиция ақпарат берген жоқ. Зардап шегушінің айтуынша, іс «топпен жасалған бұзақылық» және «заңсыз бас бостандығынан айыру» баптары бойынша тергеліп жатыр. Бірақ ол «адам ұрлау» бабын да қосып, істі қайта саралауды талап етеді.

Енді Руслан барлық кінәлілер әділ жазаға тартылатынына үміттенеді.