Нұрсұлтан Назарбаевтың бірінші баспасөз хатшысы дүниеден өтті

Қазақтың белгілі журналисі, публицист Ғаділбек Шалахметов 80 жасқа қараған шағында дүниеден өтті.

Ғаділбек Шалахметовтың қайтыс болғанын оның туысы, экономист Рүстем Жансейітов растады.

«Бүгін түнде менің жақын туысым Ғаділбек Мінажұлы Шалахметов қайтыс болды. Публицист, ақын, «Қазтелерадионың» бұрынғы төрағасы, «Мир» телеарнасын және тағы басқаларды құрушы» деп жазды Жансейітов Facebook парақшасында.

Ғаділбек Шалахметов 1943 жылы Астрахань облысында дүниеге келген. 1964 жылдан Алматыда «Қазтелерадио» мекемесінде жұмыс істеді, 1986 жылдан бастап өзі басқарды.

1991 жылдың қаңтарынан қыркүйекке дейін ол Нұрсұлтан Назарбаевтың бірінші баспасөз хатшысы. 1992 жылдың қыркүйегінен 1993 жылдың қаңтарына дейін тәуелсіз Қазақстан президентінің баспасөз қызметін қайтадан басқарды.

1993 жылы қаңтарда ТМД-ның сегіз елінің келісіміне сәйкес құрылған «Мир» телерадиокомпаниясын басқарды.

2004-2007 жылдары Мәжіліс депутаты болды. 2009 жылдың тамыз айынан бастап Гумилев атындағы Еуразия ұлттық университетінің телерадио және қоғаммен байланыс бөлімінің меңгерушісі қызметін атқарды.