Назарбаевтың немере інісіне тиесілі болған Алматыдағы «Байсат» базары сатылымға шықты

Назарбаевтың немере інісі Қайрат Сатыбалды мемлекетке қайтарған «Байсат» базары ашық электронды саудаға шығарылды, деп хабарлайды Orda.kz.

Сауда E-Qazyna порталында 2025 жылғы 18 қараша күні сағат 10:00-де (Астана уақыты бойынша) өтеді.

Қайтарылған активтерді басқару компаниясы (ҚАБК) хабарлаған ақпаратқа қарасақ, сатылымнан түскен қаржы Арнайы мемлекеттік қорға аударылып, әлеуметтік маңызы бар жобаларға жұмсалмақ.

Еске сала кетсек, былтыр Қайрат Сатыбалдыға тиесілі «Байсат» базарының үлесі мемлекетке қайтарылғаны жайлы жазған едік. 

Айта кетейік, 2022 жылдың наурыз айында Қайрат Сатыбалды «қызмет бабын асыра пайдалану» және «қаржы қылмыстарына қатысы бар» деген күдікпен ұсталды. Сол жылы қыркүйекте Астана қаласының соты оны алты жылға бас бостандығынан айыруға, мүлкін тәркілеуге және он жыл мемлекеттік қызмет атқару құқығынан айыруға үкім шығарды.

Алайда 2024 жылдың тамызында сот оның жазасының бір бөлігін жеңілдетіп, бас бостандығынан айыру жазасын бостандықты шектеу жазасына ауыстырды. Қазір ресми дерекке сенсек, Қайрат Сатыбалды пробациялық бақылауда, яғни қатаң қамауда емес, бірақ арнайы қадағалау жағдайында өмір сүріп жатыр.