Назарбаевтың бұрынғы көмекшісі 1,6 млрд үшін британ лордымен соттасып жатыр

Бұрынғы премьер-министрдің орынбасары Ербол Орынбаев британдық лорд Эванс пен Jusan Technologies Ltd. директорларын $1,6 млрд активті «арзан бағамен» сату арқылы жеке пайда тапты деп сотқа берді, деп хабарлайды Orda.kz The Guardian басылымына сілтеме жасап.

Орынбаев бұрын Jusan құрылымында топ-менеджер болып жұмыс істеген.

Сот құжаттарына сәйкес, Лорд Эванс пен директорлар Jusan активтерін сату арқылы кемінде 1 млн АҚШ доллары көлемінде төлем алған. Орынбаевтың айтуынша, бұл мәміле Қазақстандағы білім жобаларын қаржыландыруға арналған активтерге қатысты және директорлар «құрылымды саяси ықпал мен жемқорлықтан қорғауға тиіс болғанына қарамастан», жеке пайда тапқан. Активтердің жалпы нарықтық құны $1,6 млрд болғанымен, олар $75 млн-ге сатылған.

Эванс пен директорлар айыптарды жоққа шығарып, Орынбаевты «өз акцияларын тиімді сата алмағанына ренжіген» деп сипаттады. Лорд Эванс «төлемдер заңды болды және мәміле 2022 жылы Қазақстан билігінің ықпалына байланысты жасалды» деп мәлімдеді.

«Бұл — екіжүзділіктің шыңы, ол мәмілелерді өз кезегінде толық қолдады», — деп мәлімдеді директорлар кеңесі.

Ұлыбритания соты алдын ала шешімінде Орынбаевтың дәлелдерін «біржақты» деп бағалады, бірақ директорлардың сыйақы алуының заңдылығы әлі анықталмағанын және мәміле жағдайлары толық зерттелмегенін айтты.

Лорд Эванс бұған дейін Лордтар палатасының ережелерін бұзғаны үшін бес айға отырыстардан шеттетілген. Қазір ол бір уақытта Ұлыбритания мен АҚШ соттарында екі процесске қатысып отыр.

Jusan Technologies Ltd. 2022 жылдан бастап Қазақстандағы білімге арналған қайырымдылық қорларына қатысты активтерді басқарған. Құжаттарға сәйкес, компания басшылығы Қазақстан билігімен байланыс орнату мақсатында тағайындалған.

Айта кетейік, Қостанайдағы айықтыру орталығында науқасты тепкен санитар 4 жылға сотталды.