НАТО мен АҚШ Украинаға әскери жеткізілімдердің жаңа жүйесін құруда – БАҚ

Еуропалық және америкалық БАҚ дереккөздерінің хабарлауынша, жаңа әскери көмек жүйесін қаржыландыруды НАТО-ға мүше Еуропа елдері өз мойнына алады, деп хабарлайды Orda.kz.       

Жоспар бойынша, Украина Қарулы Күштеріне ең қажет қару-жарақ тізімін жасап, оны Priority Ukraine Requirements List (PURL) деп атайтын болады. Солтүстік Атлантика альянсына кіретін елдер өз қорларынан немесе АҚШ-тан сатып алып  осы тізім бойынша Украинаға қару жеткізеді. Бұл процесті НАТО-ның бас хатшысы Марк Рютте үйлестіретін болады.

Жеткізілімдер әрқайсысы шамамен 500 миллион доллар тұратын пакеттер түрінде жүзеге асады. Еуропалық шенеуніктің айтуынша, НАТО елдері жалпы сомасы 10 миллиард доллар болатын қару-жарақты Украинаға осылайша жеткізуді көздеп отыр. Бұл жоспар қандай уақыт аралығында жүзеге асады — әзірге нақты белгісіз.

АҚШ президенті Дональд Трамп 10 шілдеде НАТО-ға қару-жарақты сату жоспарларын жариялады, бұл қару кейін Украинаға жеткізіледі. Алайда, бұл механизмнің нақты егжей-тегжейін ол ашып айтпады.

Соңғы апталарда Ақ үй басшысы Ресей президенті Владимир Путинге көңілі толмайтынын ашық білдіріп жүр. Ол Ресей басшысының Украинадағы соғысты тоқтатуға ниеті жоқ екенін айтып, 29 шілдеде Путинге 10 күн ішінде соғысты тоқтату жөнінде ультиматум жариялады. Кремль бұл мәлімдемеге «назар аударылды»   деп қысқаша жауап берді.

Германияның қорғаныс министрі Борис Писториус 1 тамызда елінің алдағы күндері Украинаға екі Patriot зениттік-зымыран кешенін жеткізетінін, ал алдағы 2–3 айда осы әуе шабуылына қарсы жүйенің қосымша компоненттерін беретіні туралы мәлімдеді.

Бұл Вашингтонның Германияға соңғы үлгідегі Patriot жүйесін жеткізуді бірінші кезекке қою туралы уәдесінен кейін мүмкін болды. Қазіргі таңда Германияда бастапқыдағы 12 кешеннің алтауы ғана қалды: үшеуі Украинаға берілген, екеуі Польшада орналасқан, біреуі Германия Қарулы Күштері мен украин сарбаздарын оқыту мақсатында қолданылады. 

Биылғы маусым айының ортасында АҚШ әуе шабуылына қарсы қорғаныс құралдарын Украинадан Таяу Шығысқа ауыстырды. 

Наурыз айының аяғында АҚШ пен Ресей Украина бойынша келіссөздерді бірлескен мәлімдемесіз аяқтады.