Монополияға қарсы агенттік Air Astana компаниясын сотқа берді

Air Astana және Scat авиакомпанияларына қатысты әуе билеттерінің монополиялық жоғары бағасын белгілеуге байланысты тергеу жүргізілді.

Бұл туралы Orda.kz хабарлайды.

Air Astana авиакомпаниясы монополияға қарсы тергеудің жүруіне кедергі келтірді, деп мәлімдеді бәсекелестікті қорғау және дамыту агенттігі.

— Агенттік кейбір ішкі бағыттар бойынша әуе билеттеріне монополиялық жоғары бағаны белгілеу бөлігінде үстем немесе монополиялық жағдайды теріс пайдалану бойынша Scat және Air Astana компанияларына қатысты тергеп-тексерулер жүргізеді. Тергеу барысында Air Astana тарапынан Агенттіктің лауазымды тұлғаларына кедергілер жасалды, - деп мәлімдеді ведомствода.

Авиакомпания монополияға қарсы агенттік қызметкерлеріне тергеуге қажетті маңызды ақпараттарды бермеді. Осыған байланысты агенттік компанияны әкімшілік жауапкершілікке тарту үшін сотқа шағым түсірді.

— Сот шешімімен агенттіктің талап-арыздары қанағаттандырылды, сондықтан атқарушылық іс жүргізу басталды. Осы себепті қазіргі уақытта тергеулер тоқтатылды, - деп толықтырды агенттік.

Air Astana компаниясына қатысты монополияға қарсы органның тергеуі 2022 жылдың қаңтарына дейін жалғасады.