«Миы шайқалғанша ұрған»: Жетінші сынып оқушыларының үстінен қылмыстық іс қозғалды

Атырау облысы Индер ауданы Индербор ауылында жетінші сынып оқушысы сыныптастарының соққысынан кейін миы шайқалып, ауруханаға түсіп қалды, деп хабарлайды Orda.kz тілшісі.

Зардап шеккен баланың туыстарының айтуынша, оқиға мектепте болған, қазір бала ауыр жарақатпен ауруханада жатыр. Зардап шеккен баланың ата-анасы бұл істі жауып тастамауы мүмкін деген күдігін айтты.

«Бұл істі жауып тастағысы келеді. Өйткені баланы ұрғандар 16 жасқа толмағандар. Бірақ, баланы ересек адамша ұрған. Төбелеске қатысқандардың туыстары кешірім сұрап келді. Бірақ біз кінәлілердің жазаланғанын талап етеміз», – дейді жақындары.

Қазіргі уақытта білім беру бөлімі мектепке қызметтік тексеріс жасауды жоспарлап  отыр.

«Тексеру қорытындысы бойынша тиісті шара қабылданатын болады. Ақпарат белгіленген тәртіппен уәкілетті органдарға жолданды», — деп сендірді шенеуніктер.

Редакциямыздың арнайы сауалына полиция жауап беріп, тергеу басталғанын хабарлады. Төбелеске қатысы бар деген барлық жасөспірімнен жауап алынатыны мәлім болды.

«Индер ауданы бойынша кәмелетке толмаған балаға дене жарақатын келтіру дерегі бойынша қылмыстық іс тіркелді. Оқиғаға қатысушылар кәмелетке толмағандықтан, олардан жауап алу заңды өкілдерінің қатысуымен жүргізіледі. Қазіргі уақытта оқиғаның барлық мән-жайы анықталып жатыр», деп хабарлады полиция департаменті.

Сонымен қатар, қол жұмсаған жасөспірімдер есепке қойылуы мүмкін. Кәмелетке толмағандар ісі жөніндегі комиссия осы жағдайды қолға алып, сол жасөспірімдермен тікелей жұмыс істейді.