Мемлекет басшысы парламенттік реформа жөніндегі жұмыс кеңесін өткізді

Президент Қасым-Жомарт Тоқаев мемлекеттік кеңесші Ерлан Қаринмен және президенттің құқықтық мәселелер жөніндегі көмекшісі Ержан Жиенбаевпен жұмыс кеңесін өткізді, деп хабарлайды Orda.kz. 

Ерлан Қарин мемлекет басшысына Парламенттік реформа жөніндегі жұмыс тобы қызметінің аралық нәтижелері туралы мәлімет берді.

Оның айтуынша, e-Otinish мемлекеттік платформасы мен Egov сервисінің «Парламенттік реформа» арнайы бөлімі іске қосылғаннан бері 500-ге жуық ұсыныс келіп түскен екен. Халық арасынан, сарапшылардан және қоғамдық ұйымдардан жолданған ұсыныстар мен бастамаларды талдау, жүйелеу жұмыстары жалғасып жатыр.

Парламенттік реформа жөніндегі жұмыс тобының бұған дейінгі отырыстарында бір палаталы парламентті қалыптастыру және оның заңнамалық функцияларын жүзеге асыру мәселелері талқыланған. Сонымен қатар, 9 қаңтарға жоспарланған жұмыс тобының кезекті жиынында қалған бағыттар бойынша ұсыныстар егжей-тегжейлі қаралмақ. 

Мемлекеттік кеңесші президентке Ұлттық құрылтайдың жұмыс секциялары бойынша желтоқсан айында өткен отырыстың қорытындылары және Құрылтайдың алдағы бесінші басқосуына дайындық барысы туралы баяндады.

Айта кетейік, Тоқаев Назарбаев пен Путин арасындағы әңгіме оны еш қызықтырмайтынын айтты.