Мамин ерекше қорғалатын табиғи аумақтарда шөп шабуға рұқсат берді

Премьер-министр Асқар Мамин мал азығын дайындау бойынша кеңес өткізді.

Бұл туралы Orda.kz министрлер кабинеті басшысының сайтына сілтеме жасап хабарлады.

Ауыл шаруашылығы министрлігі жанынан жем-шөп сатып алу мәселелерін үнемі бақылау және жедел шешу мақсатында республикалық жедел штаб жұмыс істейді. Өңірлерде мал азығын сатып алу жоспарлары анықталды.

18 шілдедегі жағдай бойынша 10,6 млн тонна шөп дайындалды, бұл жоспарланған көлемнің 44%. Сонымен қатар, 1,6 млн тонна сенаж, 2,1 млн тонна сүрлем, 4,8 млн тонна сабан және 6 млн тонна концентратталған жем сатып алынады.

Шөп шабуды ұйымдастыру үшін 255,8 мың гектар орман алқаптары аумағы берілді. 6,5 мың шөп бригадалары ұйымдастырылды, әкімдіктер 41,4 мың тонна жанар-жағармайды жеңілдетілген бағамен қайта бөлді.

«Азық-түлік келісім шарт корпорациясы» 4-5 сыныптық арпа мен бидайды 170 мың тонна көлемінде сатып алуды қаржыландырды, қосымша 30 мың тонна компанияның ішкі резервтері есебінен қайта бөлінеді.

Асқар Мамин халыққа жем-шөпті қол жетімді бағамен сатуды ерекше бақылауға алуды тапсырды. Ол үшін ауылшаруашылық тауар өндірушілерімен, ұн және жем зауыттарымен меморандумдар жасау қажет екендігі айтылды.

Премьер-Министр үкіметтік резервтен «Азық-түлік келісім шарт корпорациясы» 200 мың тонна астық мал азығын алдын-ала сатып алуға қаражат бөлу мүмкіндігін қарастыруды тапсырды.

«Қазақстан Темір Жолына» Маңғыстау және Қызылорда облыстарына жем тасымалдауда төмендетілген тариф ұсыну тапсырылды.