«Мал қорадан шаршадым»: Өзіне қол салған сарбаздың ата-анасы сот шешіміне наразы

Былтыр қарашада 18 жастағы қатардағы жауынгер Мұхамедияр Тастан шекара қызметіне қарасты әскери бөлімде өзіне қол жұмсады. Биыл 23 сәуірде Семей гарнизонының әскери соты сарбазға «психологиялық және физикалық қысым көрсетті» деп, бөлімшенің кіші сержанты Азамат Тақыбаевты алты жылға соттады. Тақыбаев та, марқұм сарбаздың әке-шешесі де Мұхамедиярдың қазасына жалғыз сержант қана жауапты дегенге келіспейді, деп хабарлайды Orda.kz.

Жеті ай бұрын 18 жастағы ұлын жер қойнына тапсырған түркістандық Арман Тоғызбаев пен Рахима Жандарованың таяуда шыққан сот үкімінен соң да жаны жай табар емес. Балаларының әскерде көрген қорлығы мен тергеу барысы туралы «Азаттық» радиосына олар бірде күйініп, бірде көңілі босап баяндап берді.

Түркістан облысы Жаңабазар ауылының тумасы Мұхамедияр Тастан 2024 жылы қыркүйекте Шығыс Қазақстан облысындағы Ұлттық қауіпсіздік қызметіне қарасты «Құмбел» шекара бөлімінде әскери борышын өтеп жүрген. Туыстарының айтуынша, әскерге өз еркімен барған жас жігіт болашақта әскери қызметкер болуды армандапты.

Екі айға жетер-жетпес уақыттан соң үй іші Мұхамедияр шекара бөлімінің қарауыл мұнарасында күзетте тұрғанда өзін-өзі атып тастаған деген суық хабар алған.

«Сот офицерлердің әрекетіне құқықтық-қылмыстық баға берген жоқ. Олар туралы ешкім ештеңе деген жоқ. Сотталған старшина Тақыбаевтың адвокаттары да офицерлердің ісі бөлек қаралуы керек деді. Біз де қайта-қайта сұрадық. Бірақ жауап болған жоқ», – деді Арман Тоғызбаев.

Марқұм сарбаздың әкесі бұл іс бойынша тек бір адамды – кіші сержант Азамат Тақыбаевты ғана соттау туралы келісім болған деп топшылайды. «Сарбаздар да, басқа қызметкерлер де тек сол старшинаны қаралап сөйлеген».

«Әлгі бөлімде балаларды әркім бір ұрған, шетінен зәбір көрсеткен. Қинап қазша жүргізген. Ұйықтатпаған. Құл сияқты ұстаған. Бәрінің қолы көгерген. Енді олар осының бәрін тек Тақыбаевқа жауып отыр. Балаңыздың түбіне жеткен тек сол деп отыр», – деді Мұхамедиярдың әкесі.

Сотталған кіші сержант Азамат Тақыбаев та осылай дейді. «Екі офицер – Тоқсанбаев пен Садықов басқа сарбаздарды маған қарсы сөйлетіп отыр» деп есептейді ол. Өзі марқұм Мұхамедиярға ешқашан қол көтермегенін, қысым көрсетпегенін айтқан.

Тақыбаевтың сөзінше, офицер Тоқсанбаев шекара бөлімінде бірнеше рет сарбаздарға балағат сөздер айтып, Мұхамедиярды ұрғанын да көрген.

«Түнгі уақытта сарбаздарды іш киіммен сапқа тұрғызып, балағаттап ұрысқан сәттер де болды», — дейді ол.

Яғни, сотталушы Тақыбаев Мұхамедиярдың өзіне қол жұмсауына басқа әскери шенділердің сарбаздарға көрсеткен қысымы да әсер еткен болуы мүмкін деп есептейді.

Еске сала кетсек, былтыр әскерге аттанып, мүгедек болып қайтқан Ербаян Мұхтардың жағдайы қоғамды дүр сілкіндірген еді. Orda.kz Ербаянның жақындарымен сұхбаттасқан болатын. Былтыр 19 қыркүйекте Аягөз гарнизонының 10810 әскери бөлімінің лейтенанты Нұрсұлтан Алдамұратовтың денесі өзінің тұрғылықты жерінен табылды. Сонымен қатар Ақтау гарнизонының 25744 әскери бөліміне мерзімді әскери қызметін өтеуге жалғыз ұлын жіберген отбасына баланың мүрдесі қайтқан болатын. Бұл оқиға да жұрттың жағасын ұстатты.