Лукашенко Трамптың арнайы өкілі келгеннен кейін 14 саяси тұтқынды босатты

Беларусьте 14 саяси тұтқын бостандыққа шықты, олардың арасында белгілі оппозиционер әрі саяси блогер Сергей Тихановский бар. Ол – Беларусь оппозициясының жетекшісі Светлана Тихановскаяның жары. Олардың кездесуі Вильнюсте өтіп те үлгерді, деп хабарлайды Orda.kz.

Босату АҚШ президенті Дональд Трамптың арнайы өкілі Кит Келлог Минскіге сапармен келгеннен кейін жүзеге асты. Ол Тәуелсіздік сарайында Александр Лукашенкомен келіссөздер жүргізген. Арнайы өкілдің орынбасары Джон Коулдың айтуынша, «қазіргі уақытта барлық 14 адам бостандықта».

Сондай-ақ босатылғандар қатарында үш Польша азаматы бар. Польша Сыртқы істер министрлігі бұл ақпаратты растады және Трамп әкімшілігіне мен президент Анджей Дудаға қолдау көрсеткені үшін алғыс білдірді. Олардың есімдері ресми түрде жарияланған жоқ.

Литваның Сыртқы істер министрі Кястутис Будристің хабарлауынша, босатылғандар қазір Литва аумағында, оларға қажетті көмек көрсетілуде.

2020 жылы қамауға алынғанға дейін Сергей Тихановский YouTube арнасын жүргізіп, президенттік сайлауға қатысуға ниет білдірген болатын. Алайда ол сайлау қарсаңында ұсталды. Оның орнына сайлауға жұбайы Светлана Тихановская түсті және бұл оны Беларусьтегі наразылық қозғалысының символына айналдырды.

2021 жылы Гомель соты Тихановскийді «жаппай тәртіпсіздіктер ұйымдастырғаны үшін» сот  арқылы 18 жыл қатаң режимдегі колонияға қамады.