Қызылордада мүмкіндігі шектеулі баланы қорлап, аяғын күйдіргендер ұсталды

Қызылорда облысында арбаға таңылған баланың ата-анасы ұлының аяғынан күйік пен жарақат белгілерін байқаған. Олар мұндай әрекетке жергілікті жасөспірімдерді кінәлап, құқық қорғау органдарына жүгінді, деп хабарлайды Orda.kz.

Баланың анасы ұлының аяғындағы күйікті көрсеткен видеоны әлеуметтік желіде жариялады. Ата-анасы ІІМ басшылығына жолдаған үндеуінде азаптау мен қорлау дерегін тексеріп, кінәлілерге қатаң жаза қолдануды талап етті. Сондай-ақ олар соңғы уақытта балалар арасындағы қатыгездік көбейгенін атап өтті.

Қызылорда облысы полиция департаменті жасөспірімдердің баланың жүре алмайтын аяғын күйдіргенін растады.

«Бұзақылық фактісі бойынша қылмыстық іс қозғалды. Күдікті кәмелетке толмаған жасөспірім ұсталып, уақытша ұстау изоляторына қамалды. Қазір оқиғаның барлық мән-жайын анықтау үшін тергеу жүргізілуде. Полиция департаментінің бастығы Серік Ергешов қылмыстық істің тергеу барысын ерекше бақылауға алды», деп мәлімдеді ведомство.

Бұған дейін сарапшылар Қазақстанда жасөспірімдер қылмысы антирекорд жаңартқанын айтқан еді. Биыл тоғыз айда 1703 жасөспірім қылмыстық жауапкершілікке тартылды. Бұл – 2019 жылдан бергі ең жоғары көрсеткіш.