Қырғызстанда өлім жазасына кесу мәселесі референдумға шығарылады 

Қырғызстан Президенті Садыр Жапаров ауыр қылмыстар үшін өлім жазасын қайтару туралы шешімді билік емес, халық қабылдайтынын мәлімдеді, деп хабарлайды Orda.kz.

Бұл туралы мемлекет басшысы «Кабар» мемлекеттік ақпарат агенттігіне берген сұхбатында айтты. Сұхбаттың негізгі тұстарын Президенттің баспасөз хатшысы Асқат Алагөзов өзінің Facebook парақшасында жариялаған.

Жапаровтың айтуынша, алдымен бұл жоба қоғамдық талқылаудан өтеді, кейін Конституциялық соттың қорытындысы алынады. Осыдан соң ғана мәселе бүкілхалықтық референдумға шығарылады. Егер референдумда халық қолдаса, парламент заң кодекстеріне тиісті өзгерістерді қабылдап, қажет болған жағдайда халықаралық келісімдерден шығу мәселесін де шешеді.

Билік бұл ретте қатаң процессуалдық кепілдіктерді қамтамасыз етуге уәде беріп отыр: тергеу істері мұқият жүргізіліп, бейне және басқа да айғақтармен дәлелденетін болады, сот процестері ашық өтеді (оның ішінде онлайн трансляциялар қарастырылады), сондай-ақ жәбірленушілердің туыстарының қатысуына мүмкіндік беріледі. Бұл — сот қателіктерінің алдын алу үшін жасалмақ.

Президент бұл ұсыныс тек кісі өлтіру және кәмелетке толмағандарға қарсы жасалған қылмыстарға қатысты екенін, ал сыбайлас жемқорлық істеріне қолданылмайтынын ерекше атап өтті.

Бұл бастама қоғамда үлкен резонанс тудырды: бір тарап әлсіз топтарды қорғау үшін жазаны күшейтуді талап етсе, енді біреулер бұл қадамның құқықтық және халықаралық салдарына алаңдайды. Билік референдум өткізу тәртібі мен мерзімі туралы жан-жақты түсіндіру жұмыстарын жүргізуге уәде берді.

Аталған бастаманың туындауына 2025 жылғы қыркүйек айының соңында 17 жастағы Айсулуу Мукашеваның қатыгездікпен өлтірілуі себеп болды. Президент бұл істі жеке бақылауына алған.

Үш күн бұрын Қырғызстан президенті Садыр Жапаров  әйелдерді өлтіріп, жас қыздарды зорлағандарға өлім жазасын енгізуді тапсырды, енді бұл мәселені қырғыз халқы таразыламақ.