Қымбат сағаттар, элиталық көлік пен кортеж: Қызылорда облысының әкімі тағы да сын астында қалды

Қызылорда облысының әкімі Нұрлыбек Нәлібаев қымбат заттарға құмарлығымен тағы да жұртшылықтың назарына ілікті. Бұл жолы аймақ басшысы Шиелі ауылына құны 41 миллион теңгеден басталатын элиталық Chevrolet Tahoe жол талғамайтын көлігімен келді, деп хабарлайды Orda.kz.

Әкіммен бірге шенеуніктердің кортежі де болды, олардың арасында қымбат Maybach көлігі көзге түсті. Журналист, «Обожаю» жобасының авторы Асхат Ниязов бұған назар аударып, әлеуметтік желіде өз пікірімен бөлісті:

«Нәлібаев, әрине, көліктің есігін өзі ашпайды. Бұны қойшы. Ол келгенде бюджет қызметкерлері шапқылап жүретініне үйреніп қалдық. Тағы бір сұрағым бар: 45 миллион теңге тұратын Chevrolet Tahoe әкімдікке тиесілі ме? Шенеуніктердің айтуынша, оны демеушілер берген. Ал Maybach көлігі мүлде әкімдікі емес екен» деп жазды ол.

Жазба жарияланғаннан кейін журналистке әкімдіктен телефон соққан. Orda.kz редакциясы да облыстың баспасөз қызметіне хабарласқанымен, баспасөз хатшысының еңбек демалысында екені белгілі болды.

Әңгіме барысында ол әкім мінетін Chevrolet автокөлігінің Қазақстанда құрастырылғанын растады. Алайда ол басқа сұрақтарға жауап беруден бас тартты. Бұл ретте ол бізге Қызылорда облысы әкімі аппараты басшысының орынбасары Бақытжан Омаров түсініктеме береді деп уәде берді.

Нәлібаев қымбат заттарға қатысты бірінші рет дауға қалып отырған жоқ. 2022 жылы оның құны тоғыз миллион теңге тұратын Rolex сағаты әлеуметтік желілерде қызу талқыланды. Бұдан кейін бұрынғы вице-премьер Ералы Тоғжанов бұл туралы айтып, шенеуніктер қарапайым болуы керек деді.