ҚР Ұлттық Олимпиада комитеті Шымкентте спорт қайраткерлеріне құрмет көрсетті

Қазақстандағы Олимпиадалық қозғалыстың 30 жылдығына орай Ұлттық Олимпиада комитеті өңірлерде бірқатар шараларды жалғастыруда. Ауқымды салтанатты шара аясында Қазақстан Республикасы ҰОК делегациясы Шымкентке барды.

Шымкент Қазақстанға есімдері көпшілікке белгілі көптеген атақты спортшыларды шығарған жер. Бұл – көркем гимнастикадан бес дүркін Олимпиада чемпионы Нелли Ким, грек-рим күресінен төрт әлем кубогының жеңімпазы Бисолт Дециев, көркем гимнастикадан бірнеше дүркін Азия чемпионы Әлия Юсупова, бокстан Олимпиаданың күміс жүлдегері Мұхтархан Ділдәбеков, Олимпиаданың күміс жүлдегері Жазира Жаппарқұл (ауыр атлетика), каратэден Олимпиаданың қола жүлдегерлері Софья Берульцева мен Дархан Асадилов, батут гимнастикасы бойынша әлем кубогының жүлдегері Пирмаммад Әлиев т.б.

Арнайы шара аясында 30 жыл ішінде Қазақстан Республикасындағы олимпиадалық қозғалыстың дамуына зор үлес қосқан ардагерлер мен спорт қайраткерлерін, көрнекті спортшылар мен жаттықтырушыларды еске алу салтанаты өтті.

Мерейтойлық медальдар мен дипломдар Азияның бірнеше дүркін чемпионы Әлия Юсуповаға, бокстан Олимпиада ойындарының күміс жүлдегері Мұхтархан Ділдәбековке, каратэден Олимпиаданың қола жүлдегері Дархан Асаділовке, садақ атудан ҚР құрамасының бас бапкері Григорий Кимге, бокстан әлем чемпионы Біржан Жақыповқа, атақты атқыштар Рашид Юнусметовке, Юрий Юрков пен Зоя Кравченкоға бұйырды.

ҚР ҰОК делегациясы мерейтойлық мереке аясында Қазақстанның барлық аймақтарында іс-шаралар өткізуде. Белгілі спортшылар, ардагерлер, спорт қайраткерлерінің қатысуымен салтанатты шаралар әр облыста өткізілуде.