Қошанов: қаза болған кеншілер отбасыларына барлық қажетті көмек көрсетіледі

Мәжіліс басшысы Ерлан Қошанов Костенко атындағы шахтада қаза тапқан кеншілердің туған-туыстары мен жақындарына көңіл айтты. Зардап шеккендердің тезірек сауығып, үйлеріне оралуын тіледі.

Оның айтуынша, кеншілердің отбасыларына барлық қажетті көмек көрсетіледі.

«Бұл мәселе мемлекет басшысының ерекше бақылауында. Мемлекет басшысы Үкіметке тиісті тапсырма берді. Кеншілердің отбасыларына барлық қажетті көмек көрсетіледі. Қайғылы жағдайдың мән-жайын анықтау үшін үкіметтік комиссия құрылып,  жұмысын бастады. Бұл факті бойынша Бас прокуратура қылмыстық іс қозғады. Оқиға орнында мәжіліс депутаттары да бар» деп жазды Қошанов. 

Ол сондай-ақ президенттің «АрселорМиттал Теміртау» компаниясымен инвестициялық ынтымақтастықты тоқтату туралы тапсырмасына тоқталды.

«Оларға қарасты кәсіпорындарда адам шығыны мен жазатайым оқиғалар жиілеп кетті. Бұл ең алдымен осы компанияның жауапкершілігі. Сондықтан депутаттар бұны Президенттің дұрыс шешімі деп толықтай қолдайды. Мемлекет үшін адам өмірі мен денсаулығынан маңызды ештеңе жоқ, осыған байланысты еліміздегі барлық инвесторлар мен өндірістік компаниялар осы ұстанымды басшылыққа алуы керек», - деп баса айтты Мәжіліс төрағасы.