«Кешірім сұрасын»: «Кальмар ойыны» 2 сериялы дауға қалды

Вьетнамда танымал «Кальмар ойыны» сериалының екінші маусымына қатысты дау шықты. Көрермендер жобаға Вьетнам соғысы туралы тарихи деректерді бұрмалады деген айып тағып, бойкот жариялауға шақырды, деп хабарлайды Orda.kz YesAsia.ru сайтына сілтеме жасап.

Дегенмен, сериал Кореяда да, Netflix-тің жаһандық рейтингінде де көш бастап тұр.

5 қаңтарда Вьетнамдық Lao Dong және Tuoi Tre басылымдары елдің Кинематография басқармасы көрермендердің шағымдарына қарап тексеріс бастағанын хабарлады. Дау туғызған эпизодта Кан Дэхо (Кан Ха Ныль) мен Пак Чонбэ (Ли Со Хван) арасындағы диалог назарға алынған.

«Әкем мені нағыз еркек болсын деп теңіз жаяу әскеріне жіберді. Ол – Вьетнам соғысының ардагері», – дейді эпизодта Дэхо.

Оған Чонбэ: «Сіздің әкеңіз – тамаша адам болыпты», – деп жауап қатады.

Бұл сөздер кейбір вьетнамдық көрермендердің наразылығын тудырды. Олар осы сөздерді АҚШ-тың Вьетнам соғысындағы әрекеттерін ақтау немесе мақтан ету деп түсінген. Әлеуметтік желі қолданушылары сериалды елге қарсы пікірді насихаттап жатыр деп сынға алды.

Кейбір осындай қарсылықтарға қарамастан сериал танымалдылығын жоғалтқан жоқ. FlixPatrol сайтының мәліметінше, 26 қарашада премьерасы өткен «Кальмар ойынының» екінші маусымы 4 қаңтарға дейін Вьетнамда бірінші орынды бермей келеді. Сонымен қатар, ол Netflix-тің жаһандық үздік ондығында тұр.

Жаңа маусым Ки Хунның (Ли Чон Джэ) оралып, Фронтменмен (Ли Бён Хон) күресін көрсетеді. Сюжет қайтадан қанды ойынның жаңа қатысушыларына ден қояды.

Сериал шыққан сәттен бастап әлемнің 93 елінде рейтинг көшін бастап, «Алтын глобус» сыйлығының «Үздік телесериал» номинациясына ұсынылды. Алдағы күндері Вьетнамның Кинематография басқармасы өз қорытындысын жариялауы мүмкін.