Кентауда «Хизб-ут-Тахрир» тобының мүшелері құрықталды

Кентау қаласында «Хизб-ут-Тахрир» діни-экстремистік ұйымының жасырын тобы жойылды, деп хабарлайды Orda.kz.

Ішкі істер министрлігінің мәліметінше, экстремизмге қарсы іс-қимыл жөніндегі бөлімшесі Ұлттық қауіпсіздік комитетінің көмегімен «Хизб-ут-Тахрир» ұйымының 10 мүшесін ұстады.

«Топ мүшелері шетелдік радикалды уағызшылардың, соның ішінде «Хизб-ут-Тахрир» ұйымының дәрістерін тыңдап, тарату үшін интернет-ресурстарды пайдаланған» делінген ІІМ түсіндірмесінде.

Белгілі болғандай, топ жетекшісі бұрын тыйым салынған діни-экстремистік ұйым қызметіне қатысқаны үшін сотталған. Тінту кезінде топ мүшелерінен діни-экстремистік әдебиеттер мен басқа да дәлелдер табылды. Терроризмді насихаттау және діни араздық қоздыру әрекеттері бойынша сотқа дейінгі тергеу жүргізілуде.

Еске сала кетейік, маусым айында «Хизб-ут-Тахрир» ұйымының екі мүшесі ұсталған болатын. Ал шілде айында осы ұйымның 22 радикалды мүшесі Шымкентте ұсталды.

Айта кетейік, «Хизб-ут-Тахрир» террористік ұйымына Қазақстанда 2005 жылғы 28 наурыздан бастап ресми түрде тыйым салынған.