Қазақстанға АҚШ-тан халықаралық пошта арқылы ірі көлемде электронды темекілер жеткізілген

Құрамында психотроптық зат бар вейптерді ел аумағына жеткізу арнасы әшкереленді.

Қаржылық мониторинг агенттігі баспасөз қызметінің хабарлауынша, психотроптық заттарды ірі көлемде мемлекеттік шекара арқылы заңсыз өткізу фактісін ведомствоның Алматы бойынша департаменті тергеп-тексеріп жатыр.

Қалалық авиациялық көлік прокуратурасының үйлестіруімен "Жетісу" кеден бекетінің аймағында психотроптық зат – тетрагидроканнабинол бар 84 дана электронды темекі салынған пошта жөнелтілімдері анықталды.

"Жедел-іздестіру шараларының нәтижесінде тағы 103 дана электронды темекі және иісі бар қоңыр түсті сұйықтық құйылған 42 клиромайзер табылып, тәркіленді. Бұл сәлемдемелер Қазақстанға АҚШ-тан халықаралық пошта арқылы келген. Сот қаулысымен осы қылмысты жасады деген күдікке ілінген адамға қатысты 2 ай мерзімге қамауға алу түріндегі бұлтартпау шарасы таңдалды. Сотқа дейінгі тергеу жалғасып жатыр" деп хабарлады ведомство.