Қазақстанға 42 градусқа дейінгі аяз келді

Қазақстанның солтүстік облыстарында аязды күндер басталды. Қазгидромет дауылды ескерту жариялады, деп хабарлайды Orda.kz.

Синоптиктер сенбі күні Павлодар облысында 37-42 градус аяз болады деп болжап отыр.

Ақмола облысында термометр 40 градусқа дейін төмендейді.

Ал Солтүстік Қазақстан облысында 35-40 градусқа дейін қатты аяз күтілуде. Петропавлда ауа температурасы 36-38 градус аязға дейін төмендейді.

Қостанай облысында сенбі күні тұман күтіледі.

Алматы облысында таулы аймақтарда қалың қардың жаууына байланысты дауылды ескерту жарияланды. Сондай-ақ кей жерлерде тұман, көктайғақ күтіледі. Алматы, Қонаев қалаларында кей жерлерде тұман болады.

Маңғыстау облысында батыста, шығыста, облыс орталығында шығыстан соғатын желдің екпіні 15-20 м/с жетеді.

Жетісу облысының таулы аймақтарында қалың қар жауады. Оңтүстікте, облыстың таулы аймақтарында тұман, көктайғақ күтіледі. Облыстың Алакөл көлдері мен таулы аймақтарында солтүстік-шығыстан жел соғады, екпіні 15-20 м/с жетеді.