Қазақстан президенті жаңа Құрылыс кодексіне қол қойды

Құжатта бірыңғай құрылыс порталын енгізу және жобалаудың барлық кезеңінде сейсмикалық карталарды пайдалану қарастырылған, деп хабарлайды Orda.kz.       

Қазақстан президенті Қасым-Жомарт Тоқаев жаңа Құрылыс кодексіне қол қойды, деп хабарлады Ақорданың баспасөз қызметі. Құжатта бірыңғай құрылыс порталын енгізу, құрылыс нысандарына бірегей құрылыс нысаны нөмірін беру, сондай-ақ жобалаудың барлық кезеңінде сейсмикалық микроаудандастыру карталарын пайдалану көзделген.

Жаңа кодекске сәйкес, егжей-тегжейлі жоспарлау жобаларына түзетулер екі жылда бір реттен жиі енгізілмейді. Сонымен қатар құрылыс нысандары сейсмикалық тәуекелді бағалау үшін паспортталатын болады.

Мемлекеттік сәулет-құрылыс бақылауы мен қадағалау функцияларын күшейту жоспарланып отыр. Енді олар жоспардан тыс тексерулер нәтижелері бойынша жедел ден қою шараларын қолдана алады.

Құрылыс саласындағы сарапшылар үшін сертификаттау жүйесін енгізу және бірыңғай цифрлық тізілім құру көзделген. Облыстардың, республикалық маңызы бар қалалардың және астананың әкімдіктері жанынан сәулет-қала құрылысы кеңестері құрылатын болады.

Сонымен қатар, өткен жұма күні президент қол қойған сәулет, қала құрылысы және құрылыс мәселелері жөніндегі заңға енгізілген түзетулерге сәйкес, сәулет, қала құрылысы және құрылыс саласындағы уәкілетті органның құзыретінен республикалық маңызы бар қаланың, астананың немесе облыстың бас сәулетшісін тағайындауды келісу жөніндегі норма алынып тасталады.

Оқи отырыңыздар:

• Құрылыс салушыларға тұрғын үйді қолма-қол ақшаға сатуға тыйым салынуы мүмкін
• «Пәтер бағасы қатты қымбаттайды»: экономист жаңа Салық кодексіне қатысты пікір білдірді 
• 2026 жылдан бастап мемлекеттік сатып алуда ҚҚС қалай жұмыс істейді
• Қалалық мәслихат депутатының компаниясы Алматыда жеке құрылыс салғаны үшін жазаланады