Кәрім Мәсімовтың үйінен Астана әкімдігі неге бас тартқаны белгілі болды

Мемлекетке опасыздық жасағаны үшін сотталған Кәрім Мәсімовтің үйі санитарлық нормаларға сай келмейді, деп хабарлайды Orda.kz.

2025 жылдың 10 ақпанында Қайтарылған активтерді басқару компаниясы (ҚАБК) 2022 жылы Кәрім Мәсімовтен тәркіленген үйді алғаш рет аукционға шығарды. Лоттың бастапқы бағасы – 1,8 млрд теңге, кепілдік жарна 117,9 млн теңге болды.

Алайда аукционға екі рет шығарылса да Кәрім Мәсімовтің зәулім үйін ешкім сатып алмады. Кейін бұқаралық ақпарат құралдарында кәсіпкер Мұхтар Жәкішевтің үйді сатып алуға келіскені жөнінде ақпарат тарады. Алайда Жәкішев мұндай жоспары жоқ екенін мәлімдеді.

Иесін таппаған үйдің Астана қаласының активтер және мемлекеттік сатып алу басқармасы коммуналдық меншікке қабылданатыны белгілі болды. Зәулім үйде білім беру мекемесін ашу жоспарланған еді. Бірақ бұл жоспар да іске аспады.

Bes.media басылымының ресми сауалына жауап берген білім басқармасы үйдің санитарлық нормаларға сай еместігін айтты.