Қарағандыда бір полицей көз жұмған соң бірнеше әріптесі қызметінен босатылды

Қарағандыда жаттығу кезінде бір полицей көз жұмды. Оқ атып, әріптесін мерт қылған және жаттығуды ұйымдастыру мен қауіпсіздік талаптарының орындалуына жауапты болған қызметкерлер шендерінен айырылды, деп хабарлайды Orda.kz.

Белгілі болғандай, оқиғадан кейін қызметтік тергеу басталған. Тергеу нәтижесінде Қарағанды облысы полиция департаментінің екі қызметкері жұмыстан шығарылды. Оның бірі — оқ атқан полицей. Екіншісі — оқу-жаттығуды ұйымдастыру мен қауіпсіздік талаптарының орындалуына жауапты тұлға.

Қайғылы жағдай 14 наурызда Қарағандыдағы оқу-жаттығу полигонында болған. Оқ тиген 36 жастағы Алдан Алиев – «Арлан» арнайы бөлімшесінің оқу-жаттығу взводының аға инспекторы. Оқиға орнында көз жұмған.

Сондай-ақ оқу-жаттығу взводының бастығы мен оның орынбасары қызметтерінен босатылды. Тағы бірнеше лауазымды тұлғаға сөгіс беріліп, «қызметіне толық сәйкес емес» деген баға берілген.

«Патриот» басылымының жазуынша, жаттығу өткен полигон азаматтық нысанға жатады. Яғни, кез келген адам барып атыс үйрене алады. Ал полицейлердің мұнда жаттығуының себебі — Абай ауданының Қарабас кентіндегі арнайы ату полигонына бару қиын болған.

Полицейдің қазасынан кейін ҚР Қылмыстық кодексінің 371-бабы, 2-бөлігі бойынша («Қызметке немқұрайлы қарау, адам өліміне әкеп соққан салдар») қылмыстық іс қозғалған. Тергеу жалғасып жатыр, іс әзірге сотқа жеткен жоқ.