Қарағанды облысындағы білім ордаларында 3000-нан астам заң бұзушылық анықталды

Қарағанды облысының прокуроры Бауыржан Мырзакеровтің төрағалығымен балалардың қауіпсіздігіне қатысты тексеру қорытындылары қаралған алқа отырысы өтті. Отырыста облыс әкімінің орынбасары, мемлекеттік және құқық қорғау органдарының басшылары қатысты.

Бұл туралы Orda.kz хабарлады.

Отырыс барысында облыс прокуроры балалардың құқықтарын қорғаудың маңыздылығын атап өтіп, білім беру мекемелерінде анықталған 3000-нан астам заң бұзушылықтың ауқымын жариялады. Бұл бұзушылықтар санитарлық-эпидемиологиялық және өрт қауіпсіздігі, білім беру, инклюзивті оқыту, фармацевтикалық қызмет, еңбек қатынастары, нысандардың қауіпсіздігі және мемлекеттік сатып алуларға қатысты болған.

Тексеру нәтижелері бойынша 400 қадағалау актісі шығарылып, 1500 лауазымды тұлға жауапкершілікке тартылды. Салынған айыппұлдардың жалпы сомасы 100 миллион теңгені құрады. 117 мың баланың құқықтары қорғалды. Прокуратура 4 қылмыстық іс қозғады, олардың біреуі бойынша үкім шығарылып, қалғандары тергеу сатысында.

Алқа отырысында уәкілетті органдардың өз міндеттерін орындауын қадағалауды күшейту және балалардың қауіпсіздігін қамтамасыз етуде бірыңғай тәсілдерді әзірлеу міндеті қойылды.

Қарағанды облысының прокуратурасы әрбір баланың қорғалуын және қауіпсіздігін қамтамасыз ету мақсатында осы бағыттағы жұмыстарды жалғастыратын болады.