Қарағанды облысы тау-кен құтқарушылары кәсіподақ ұйымының басшысына қатысты сот болатын күн белгілі болды

Тау-кен құтқарушылар кәсіподақ ұйымының төрағасы Алексей Головчицтің ісі алға жылжыды, деп хабарлайды Orda.kz тілшісі.

Өткен жылы қарағандылық тау-кен құтқарушылары кәсіподақ құрып, оның төрағасы етіп құтқарушы Алексей Головчицті сайлаған. Алайда ол құтқарушы қызметінен босатылды. Головчицтің бұрынғы әріптестері бұған негіз жоқ деп есептеп, оны жақтап шықты. Бірақ сот жұмыс беруші жағына шықты. Осыдан кейін аппеляцияға беруге тура келген.

Головчицті қызметіне қайтару туралы сот 19 желтоқсанға белгіленді. Бұл туралы Orda.kz журналисіне тау-кен құтқарушылар кәсіподағының заңгері Ксения Гринчук айтты.

«Бүгін маған облыстық сот алқасынан хабарлама келді. Барлығымыз әділдік орнайды деп үміттенеміз», - деді Гринчук.

Костенко атындағы шахтадағы қайғылы оқиғадан кейін тау-кен құтқарушылары бірнеше бейнехабарлама түсірді. Олар кен орнын халыққа қайтаруды және Алексей Головчицті қызметіне қайта орналастыруды талап етті.

Бұған дейін оның «аттестациядан өте алмағаны» үшін жұмыстан шығарылғаны айтылған болатын. Ал Головчицтің айтуынша, жұмыс беруші оның нәтижелерін жойып жіберген.