«Қан хайп құралы емес»: Шерзат ісіндегі адвокаттар неге қырық пышақ болды?

Талдықорғанда өтіп жатқан Шерзат Полаттың соты қоғамда кең талқыланып, резонанс тудырды. Аяқталуға таяған бұл істің көлеңкесінде жәбірленуші тараптың адвокаттары арасында өзара келіспеушілік пайда болды. Мейірман Шекеев жетекшілік еткен қорғаушылар тобының мүшелері бірінен соң бірі істен шеттетіліп жатқаны туралы әлеуметтік желіде жарияланды, деп хабарлайды Orda.kz.

Адвокат Бағдат Амандосұлы өзінің Instagram желісінде соттан неге кеткенін түсіндіріп, іс бойынша кей талаптарға келіспегенін айтты. Оның сөзінше, қорғаушылар тобына қосылу барысында мынадай талап қойылған:

Адвокат бұл сөздерді нақты кім айтқанын көрсетпегенімен, желі қолданушылары оны Мейірман Шекеевпен байланыстырып отыр.

«Менің жұмысымды иемденіп, кәсіби пікірім ескерусіз қалды. Кей әріптестерімнің қойған сұрақтары мен өтініштері үшін олар да істен шеттетілді. Бұл – кәсібилікке емес, эго мен монополияға негізделген тәсіл деп есептеймін. Мен бұған төзе алмаймын және көнбеймін. Себебі мен бұл іске біреудің имиджін көтеру үшін емес, ақиқатты табу үшін араластым», – деді Амандосұлы.

Оның айтуынша, бұған дейін Жандос Палманов пен Нұрболат Ибраев та істен шеттетілген. Айта кетейік, бұл қорғаушылар бастапқыда Шекеевтің командасы ретінде таныстырылған.

Адвокаттың айтуынша, кейбір адамдар бұл істі жеке танымалдыққа жету құралына айналдырмақ болған.

«Халық маған сенді. Істен шеттетілгенім үшін олардың көңілі қалды. Сол сенімді ақтау үшін барымды салдым. Бірақ мен біреудің көлеңкесінде қалғым келмейді. Себебі бұл істегі қан хайп құралы емес», – деп қорытындылады ол.