Қайрат Сатыбалдының Алматыдағы «Байсат» базары тағы да аукционға шығарылды

Экс-президент Нұрсұлтан Назарбаевтың немере інісі Қайрат Сатыбалдының Алматыдағы «Байсат» базарындағы үлесі аукционнан өтпеген соң қайта сатылымға шығарылды. Қазір бағасы 2 млрд теңгеге төмендеді, деп хабарлайды Orda.kz.

Қыркүйекте бастапқы баға 28,6 млрд теңге болса, қазір 26,7 млрд теңге болып белгіленді. Кепілдік жарна — 2,6 млрд теңге.

Алдыңғы аукцион 18 қарашада өтті, бірақ ешкім сатып алғамаған. 

Бұған дейін бұл базардың белгілі бір үлесі Қайрат Сатыбалдының ұлы Бауыржан Нұрсұлтанға тиесілі болған.

Айта кету керек, 2023 жылдың шілдесінде Қазақстанда заңсыз иеленген активтерді мемлекетке қайтару туралы заң күшіне енді. Сол кезден бастап біз бірнеше даулы оқиғаның куәсі болдық. Билікпен қақтығысқан олигархтар мұнай компанияларынан бастап қонақүй бизнесіне, сағат коллекцияларынан  сақ дәуірінің алтынына дейінгі қазыналарын беріп, бостандығынан айырылмаудың қамын жасап бақты. Алайда соңғы уақытта «заңсыз жиналған байлықты тартып алу» жайлы хабарлардың арнасы сарқыла бастады. Соның бірі — осы аукционға шығарылып, өтпей тұрған «Байсат» базарындағы Қайрат Сатыбалдының үлесі.

Еске сала кетейік, «Қайтарылған активтерді басқарушы компания» Қайрат Сатыбалдыға қарасты ЖШС-нің біріне тиесілі аяқталмаған бизнес орталығын сатқан еді. Сондай-ақ, бұған дейін Қайрат Сатыбалды іргесін қалаған медресеге жыл сайын бюджеттен 200 млн теңге құйылатыны белгілі болды.