«Қайрат» - «Ақтөбе» ойынынан кейін футбол жанкүйерлері жауапқа тартылды

Алматылық тәртіп сақшылары «Ақтөбе» мен «Қайрат» футбол клубтары жанкүйерлерін әкімшілік жауапкершілікке тартты, деп хабарлайды Orda.kz       

Ішкі істер министрлігінің ресми өкілі Шыңғыс Әлекешев бұл шешімге айтылған әдепсіз ұрандар мен қоғамдық орындардың ластануы себеп болғанын айтты. Сондай-ақ, олар спорттық іс-шараларда тәртіп ережелерін бұзып, қоғамдық орында алкогольдік ішімдіктерді ішіп, ұсақ бұзақылық жасағаны үшін әкімшілік жазаға тартылды.

«Мұндай мінез-құлық «футбол жанкүйерлері» қауымдастығына ғана емес, сонымен бірге бүкіл елдің имиджіне нұқсан келтіретінін атап өту керек, өз командаларыңызды эмоционалды түрде қолдауға болады, бірақ тек заң аясында. Қарсыластарыңыз бен қарапайым азаматтарға жаман сөз айту артық», - деді Әлекешев.

Ол сондай-ақ қоғамдық тәртіпті бұзатын әрбір заңсыз әрекет міндетті түрде жауапкершілікке әкеп соғатынын еске салды.

Дегенмен еске сала кетсек,  Ақтөбе QFL-2024 бойынша сенімді көшбасшы болып отыр. 20 сәуір күні батысқазақстандық футбол клубы сырт алаңда алматылық «Қайратты» 3:1 есебімен ұтты.