«Ит үргенде қорқып кеткен»: Ақтөбеде 1 сынып оқушысы қайтыс болды

Ақтөбеде оқушының өліміне қатысты тергеу жүріп жатыр. Полиция баланың киімі бүлінбегенін, ит тістемегенін мәлімдеді, деп хабарлайды Orda.kz.

Қайғылы оқиға Ақтөбе қаласында 28 ақпан күні сағат 7.30 шамасында тіркелді. Маресьев көшесіндегі үйдің ауласынан 1 сынып оқушысының мәйіті табылды. Ер баланың өліміне қатысты сараптама жүріп жатыр. 

«Оқиға орнына келген жедел-тергеу тобы мәйітте зорлықпен өлтіру белгілері жоқ екенін анықтады. Баланың қайтыс болу себебін анықтау үшін сараптама тағайындалды», деп мәлімдеді Ақтөбе облыстық ПД.

Ақтөбе қалалық білім бөлімі марқұмның оқушы екенін растады. Айтуынша, бала иттен қорқып кеткен. 

«Ит тістемеген. Таңертең үйден анасы, апасымен бірге шыққан. Анасы есік жабамын дегенше, бала аулаға бірінші шығып кетеді. Қоқыс контейнерінің қасынан ит үріп шыққанда бала қорқып кеткен. Құлаған. Сол кезде анасы шыққан, үйіне әкелген, жедел жәрдем шақырған»,- деді қалалық білім бөлімінің басшысы Әліби Латып.

Оқиғаға марқұмның әкесі пікір білдірді. Қайғылы жағдайдың өздері тұратын аулада болғанын растайды. 

«Анасы мектепке апара жатты. Бала осы жерде, анасы мына жақта болды. Ит шыққан. Үстіне секірген. Қызыл неміс овчаркасы. Үстіне секіргенде қорқып, баланың жүрегі жарылып кеткен. Артынан шығып келе жатқан анасы көрді. Апасы болды қасында»,-деді қайтыс болған оқушының әкесі.

Автор: Ардақ Ерубаева