Иранның жоғары шенді әскери басшысы туралы резонанс ақпарат тарады

Араб медиасында Иранның жоғары шенді әскери басшысы – Исмаил Каани туралы резонанс ақпарат тарады. Әмірліктердің The National басылымы расталмаған деректерге сүйеніп, Ислам революциясы сақшылары корпусы құрамындағы "Әл-Құдс" арнайы бөлімшесінің жетекшісі тыңшылық жасады деген күдікпен ұсталып, кейін өлім жазасына кесілгенін хабарлады.

Басылым келтірген мәліметке сәйкес, Каани Израильдің барлау қызметі – Моссад пайдасына жұмыс істеді деген айып тағылған. Кейбір дереккөздер оны бұған дейін ИРСК тергегенін жазды.

Алайда бұл ақпаратты ресми Тегеран растаған жоқ.

The National Каанидің кейінгі екі жылда "қасындағылар қаза тауып жатқанда аман қалуымен" танылғанын атап өтеді. 2024 жылы Израильдің Бейрутқа жасаған соққыларынан кейін генерал біраз уақыт байланысқа шықпай, "із-түссіз жоғалды" деген хабар тараған. Бірақ кейін ол көпшілік алдына шығып, қызметін жалғастырған.

Қазіргі таңда Исмаил Кааниге қатысты "тыңшылық" және "өлім жазасы" туралы мәліметтер расталмаған күйде қалып отыр. Тегеран тарабынан ресми түсініктеме берілген жоқ.