Иран бойынша бейбіт келіссөздер 26 наурызда басталуы мүмкін

АҚШ және делдал елдер — Пәкістан, Мысыр мен Түркия — Иранмен жоғары деңгейдегі бейбіт келіссөздерді осы бейсенбі, 26 наурызда өткізу мүмкіндігін талқылап жатыр. Алайда Тегеранның жауабы әлі күтілуде. Келіссөз өтетін орын ретінде Пәкістан астанасы Исламабад қарастырылып отыр, деп хабарлайды Orda.kz 

Израильдің 12-арнасының  мәліметінше, Дональд Трамп соғысты тоқтатуды көздейді. Бірақ Иранның Ормуз бұғазын жабуы жағдайды қиындатып, кез келген шығу стратегиясын әзірлеуге кедергі келтіріп отыр. АҚШ Израильге соғысты тоқтатуға арналған 15 тармақтан тұратын жоспар ұсынып, оны Иранға да жолдаған. Америкалықтар Тегеран бұл тармақтардың көпшілігімен келіскенін айтады, алайда бұған нақты дәлел жоқ.

«Премьер-министр Биньямин Нетаньяху Трамп Израильдің мақсаттарына сәйкес келмейтін, Иранға елеулі жеңілдіктер қарастыратын және Израиль әскери күштерінің әрекет еркіндігін шектейтін келісімге қол қоюы мүмкін деп алаңдайды»,  деп хабарлады екі израильдік дереккөз. Тағы бір дереккөз Израильде АҚШ мәлімдеген Иранның ымыраға келу ниетіне күмәнмен қарайтындар бар екенін айтқан.

Ұсынылған жоспар, атап айтқанда, Иранда уран байытуды толық тоқтатуды көздейді. АҚШ Иран бұл процесті уақытша тоқтатуға келіскенін мәлімдейді, бірақ оның нақты қанша уақытқа созылатыны белгісіз.

Сонымен қатар, Иранның ресми өкілдері бейбіт келіссөздер басталғанын жоққа шығарып отыр, бірақ АҚШ тарапынан ұсыныстар мен хабарламалар түскенін растады.

«АҚШ-тың Таяу Шығыс бойынша арнайы өкілі Стив Уиткофф пен Трамптың күйеу баласы Джаред Кушнер Иранмен сенімді келіссөз арнасын құруға тырысты. Алайда оның қаншалықты іске асатынын және өміршең болатынын айту әлі ерте» деп мәлімдеді америкалық дереккөз.

АҚШ пен Израиль шенеуніктері келіссөздер басталған күннің өзінде соғыс тағы екі-үш аптаға созылуы мүмкін деп есептейді.