Халық игілігі үшін: Алматы облысында қайтарылған қаржыға амбулаториялар салынып жатыр

Алматы облысында мемлекет меншігіне қайтарылған активтер есебінен ауыл тұрғындарына арналған медициналық нысандар бой көтеріп жатыр, деп хабарлайды Orda.kz.

Облыстық прокуратураның мәліметінше, қаржы Ұйғыр ауданындағы бірнеше ауылда әлеуметтік мақсаттағы нысандардың құрылысына бағытталған. Атап айтқанда, Кіші Дихан, Диірмен, Ават ауылдарында дәрігерлік амбулаториялар, ал Дардамты мен Шырын елді мекендерінде фельдшерлік-акушерлік пункттер салынып жатыр.

Прокуратура нысандардың құрылысын тұрақты бақылауға алғанын мәлімдеді. Құрылыс мерзімін бұзған, сапа стандарттарын сақтамаған немесе қаражатты мақсатсыз жұмсаған мердігерлерге заң аясында шара қолданылмақ.

«Бұл – қайтарылған активтердің халықтың нақты игілігіне бағытталып жатқанын көрсетеді. Медициналық көмектің қолжетімділігі арта түседі», – деді ведомство өкілдері.

Жобалар жүзеге асқаннан кейін 10 мыңнан астам ауыл тұрғыны алғашқы медициналық қызметке қол жеткізе алады деп жоспарланып отыр.

Айта кетейік, шілде айының басында Арнасай ауылында алғашқы дәрігерлік амбулатория пайдалануға берілді. Бұл елге қайтарылған актив есебінен салынған алғашқы медициналық нысан.