Грузияда халық қайтадан көтеріліп, президент резиденциясына шабуыл жасады

Грузияда қайтадан наразылықтар өршіп тұр, Тбилиси көшелеріне мыңдаған адам шықты, наразылар президент резиденциясына шабуыл жасады, деп хабарлайды Orda.kz.       

Грузия астанасы Тбилисиде жергілікті өзін-өзі басқару органдарына сайлау өтіп жатқан кезде жаппай наразылықтар басталды. Елде 2000-нан астам мәслихат (сакребуло) депутаты мен 64 мэр сайлауға түсіп жатыр.

Грузияның премьер-министрі Ираклий Кобахидзе биліктегі «Грузин арманы» партиясының кандидаттары барлық муниципалитеттерде 70 пайыздан астам дауыс жинап, жеңіске жетіп жатқанын мәлімдеді.

Алайда бұл мәлімдемеден кейін Тбилиси көшелеріне мыңдаған адам шығып, наразылық шеруі басталды. Наразылар президенттің Орбелиани резиденциясын қоршап, ауласына баса-көктеп кірген. Полиция жағдайды бақылауға алу үшін қосымша күш тартып, көз жасаурататын газ бен су атқыштарды қолданды.

Сонымен қатар наразылардың бір бөлігі парламент ғимаратының алдына жиналып, жолды жауып тастап, Бостандық алаңына бет алды. Олар «Грузия! Грузия!» деп ұрандатып жүр. Грузия БАҚ-тарының хабарлауынша, зардап шеккендер бар.

Наразылық білдірушілердің негізгі талаптары: мерзімінен бұрын парламент сайлауын өткізу,
Еуроодақпен жақындасу бағытын қайта жаңғырту, акция кезінде ұсталған барлық азаматтарды босату.

Оппозиция биліктегі «Грузин арманы» партиясын, оның негізін қалаушы Бидзина Иванишвили мен премьер-министр Ираклий Кобахидзені Ресеймен тым тығыз байланыста деп айыптап отыр.

Грузия ІІМ наразылық акциясы «заңмен белгіленген жиналыс пен манифестация шегінен шығып кетті» деп мәлімдеді.

Мамыр айында ҚР сыртқы істер министрлігі соңғы уақытта қазақстандықтардың Грузия аумағына кіруіне жиі тыйым салынып жатқанын, ал кейбіреулерінің кейін депортацияланғанын мәлімдеді.

Биылғы жылдың бірінші тоқсанында Грузияға баратын қазақстандық туристер саны 21 625 адамға жеткен. Ел халықаралық қонақтар саны бойынша 9-шы орынды иеленіп, алғашқы ондықта тұр.