«Еуразиялық қаржы компаниясы» үшін алпауыттардың соғысы: Шодиев өз компаниясына қарсы сотта жеңілді

Алматы экономикалық соты Патох Шодиев өзі үлестес болып отырған «Еуразиялық қаржы компаниясына» қарсы талап-арызын толықтай қанағаттандырудан бас тартты, деп хабарлайды Orda.kz.

Forbes дерегінше, сот ЕҚК-нің өзге бірлескен иесі Шухрат Ибрагимовтың талабын қолдады. Осыған сәйкес, 2 маусым мен 30 шілдеде өткен директорлар кеңесінің шешімдері заңды күшіне енді. Сот компанияны «Еуразиялық банк» пен «Еуразиялық капиталдың» 2024 жылғы қаржылық есебін бекітуге, сондай-ақ тәуелсіз жаңа директорлар — Ерлан Мусин мен Жанбота Бекеновты тағайындауды растауға міндеттеді. Бұдан бөлек, ЕҚК сот шығындарын Ибрагимовқа өтеуі тиіс.

Патох Шодиев директорлар кеңесінің шешімдерін жарамсыз деп тануды, сондай-ақ моральдық зиян үшін бір миллион теңге өтемақы өндіруді талап еткен еді. Бірақ сот оның бұл талабын толықтай кері қайтарды. Шодиевтің қызы Муниса да берген шағымынан нәтиже шығармады. Осылайша, «еуразиялық мұра» төңірегіндегі тартыстың қазіргі кезеңінде Ибрагимовтар әулетінің арты диірмен тартты. ЕҚК директорлар кеңесінің жаңартылған құрамында Муниса Шодиеваның есімі жоқ.

Orda.kz редакциясы Алматы қалалық мамандандырылған ауданаралық экономикалық сотынан ресми түсініктеме сұрады. Дегенмен осы ақпарат шыққан сәтке дейін жауап келмеді. Патох Шодиевтің ЕҚК-ге қарсы арызы мен компанияның қарсы талабы бойынша сот ісі Алматыда 26 тамызда басталған. Қаралу барысы жабық өткендіктен, сот шешімі шыққанға дейін нақты деректер жария етілмеді.

Сәуір айының соңында ERG бизнесін америкалық инвестор Джеймс Кэмерон сатып алмақшы деген хабар тарағанымен, компания мұны жоққа шығарды. «Еуразиялық үштіктің» таласа бастаған мүдделері туралы бұған дейін жазған едік.

«Еуразиялық қаржы компаниясы» – 2000 жылдың 22 маусымында Алматыда тіркелген қаржы ұйымы. Заңды мекенжайы – Алматы қаласында. Компания активтерді басқару мен инвестиция саласында жұмыс істейді. Негізгі иелері – Патох Шодиев, марқұм Александр Машкевич және Шухрат Ибрагимов әулеті, әрқайсысының үлесі шамамен үштен бір болған. 2025 жылдың наурызында Александр Машкевич дүниеден өткен соң, компания ішінде акционерлер арасындағы дау күшейіп, сот процестері басталды. Нәтижесінде директорлар кеңесінің жаңа шешімдері қабылданып, Ибрагимовтар әулетінің ықпалы күшейді.