ERG бақылауындағы компания Павлодардағы саябақ жерлерін заңсыз иемденіп алды

Бұл аумақта екі көпқабатты үй салу жоспарланған болатын, деп хабарлайды Orda.kz.

Павлодар облысының прокуратурасы жер телімдерін заңға қайшы жолмен беру фактісін анықтады.

Әңгіме Металлургтер саябағы аумағындағы 1,2 га жер учаскелері туралы болып отыр. Жерлер тікелей «Қазақстан алюминийі» АҚ-на берілген. Компанияны Eurasian Resources Group бақылайды.

«Қадағалау актісі бойынша заңсыз рұқсаттар жойылып, жер мемлекет меншігіне қайтарылды. Қазір саябақ аумағы қалпына келтірілді. Ал кінәлі шенеуніктер қызметінен босатылды» деп хабарлады облыс прокуратурасы.

«Қазақстан алюминийі» АҚ алюминий өндірісіне қажетті шикізат - глинозем шығарады. Компания құрамына Павлодар алюминий қорыту зауыты, ЖЭО-1, Қызылоктябрь кен басқармасы (Қостанай облысы), Керегетас әктас кеніші (Павлодар облысы) кіреді.