Ерболат Жанабылов пен Эльмира Төлегенова қылмыстық іс бойынша сотқа тартылады

Астанада Ерболат Жанабылов пен Эльмира Төлегеноваға қатысты әкімшілік істер тоқтатылды, деп хабарлайды Orda.kz.

Бұған дейін Астанада блогерлер Ерболат Жанабылов пен Эльмира Төлегеноваға қатысты әкімшілік іс қозғалған болатын. Істен қылмыстық құқық бұзушылық белгілері анықталғаннан кейін, судья Малика Ноғайбекова қылмыстық іс қозғау туралы шешім қабылдады.

Іс материалдары Астана қаласы бойынша Экономикалық тергеу департаментіне жолданды.

Еске салай кетейік, тамыз айында Instagram әлеуметтік желісінде Жаңабылов пен Төлегенованың парақшасында 10 автокөлік ойнататыны жайлы жазба жарияланды. Жазбада көлік Zhana Business ақылы оқу курсын 30 мың теңгеге сатып алғандардың арасында ойнатылатыны айтылған.

Артынша, бұл жағдай әлеуметтік желілерде сынға ұшырап, мемлекеттік органдарға шағым түскен. Кейін Туризм және спорт министрілігі тексеріс жүргізілгенін және материалдардың сотқа жолданғанын айтты. Айта кетейік, еліміздің заңнамасына сәйкес, лотереяны тек ресми операторлар мен олардың агенттері ғана өткізе алады. 

Ерболат Жаңабыловтың ісі әкімшілік құқық бұзушылық туралы кодекстің 445-1-бабы «Лотереялар және лотерея қызметі туралы заңнаманы бұзу» бойынша қаралған еді.  

«Қылмыстық құқықбұзушылық белгілеріне байланысты, заңсыз кәсіпкерлікке қатысты деректердің анықталған соң әкімшілік іс тоқтайды», – деп мәлімдеді сот.