«Ер адам экс-әйелінің мойнын кескен»: Шымкенттегі оқиғаның мән-жайы

Шымкентте ер адам әйелін пышақтады. Жәбірленушінің әпкесі қайғылы оқиғаның егжей-тегжейін айтып берді, деп хабарлады Orda.kz. 

9 сәуірге қараған түні төрт баланың анасы Ақмаралды бұрынғы күйеуі аяусыз ұрып, пышақтады.

Жәбірленушінің әпкесі Мәншүк Бубееваның айтуынша, Ақмарал шағын дүкен жалдап, кәсіп ашқан. Сол түні ол жұмыстан оралған кезде, үйінің алдында бұрынғы күйеуі белгісіз ер адаммен бірге оны бақылап, күтіп тұрады. Ер адам сөзге келмей, бұрынғы әйелін ұра жөнелген. Мәншүктің айтуынша, бірден ұрып, кейін мойнына пышақ салған. Онымен қоймай, әйелді тұншықтырған. Әйел естен танып құлайды. Күйеуі оны өлді деп ойлап, сөмкесін, дүкеннің кілтін, құжаттары мен шотындағы 500 мың теңгені алып тайып тұрады. 

Мәншүктің айтуынша, бұл отбасыда бұған дейін де зорлық-зомбылық жиі болған. Ер адам тіпті олардың ата-аналарына да қауіп төндірген көрінеді. 

Ер адам 8 сәуір күні әйелінің ата-анасына хабарласып, жақын арада бәрі бітетінін, оларды да өлтіретінін айтқан. 

Жәбірленуші 2013 жылы күйеуімен ресми түрде ажырасқан, бірақ ер адам әлі күнге дейін әйелдің мазасын алады екен. 

Ақмаралға мидың жабық жарақаты және тетрапарез диагнозы қойылды. Мәншүк әпкесі ешқашан төсектен тұрмай қала ма деп қорқады. 

Айта кетейік, Шымкентте ер адам бұрынғы әйелінің мойнына пышақ сұғып, өлтірмек болған еді.