Елімізде қылмыстық іздестіру қызметкерлері кәсіби мерекелерін атап өтуде

Қазақстанда қылмыстық іздестіру қызметкерлері бүгін кәсіби мерекесін атап өтуде,  деп хабарлайды Orda.kz.       

«5 қазан – ішкі істер органдарының бірнеше буынына таныс күн. Кеңес милициясында бұл күні Қылмыстық іздестіру күні атап өтілетін. Бұл – заң мен тәртіпті тәулік бойы күзеткен жедел уәкілдердің кәсіби мерекесі. Бұл дәстүр біздің жадымызда сақталған, өйткені тарихсыз болашақ жоқ. Қазақстан тәуелсіздік алған жылдары қылмыстық іздестіру қызметі қайта құрылып, бірнеше арнайы қызметтің – криминалдық полицияның, ұйымдасқан қылмысқа, кибер және есірткі қылмыстарына, экстремизмге қарсы бөлімlердің негізін қалады» деп жазды бүгін ішкі істер министрі Ержан Сәденов әлеуметтік желідегі парақшасында. 

Оның айтуынша, бұл – уақыт талабына сай қойылған жаңа міндеттердің көрінісі.

«Бүгін қылмыстық іздестіру саласына өмірін арнаған ішкі істер органдары ардагерлеріне шын жүректен алғысымды білдіремін. Олардың тәжірибесі мен адалдығы – қазіргі жедел қызметкерлер үшін үлгі. Қызмет атқарып жүргендерге төзімділік, ұстамдылық және кәсіби абырой тілеймін. Заң мен тәртіп жолындағы қызметтеріңіз абыройдың, жауапкершіліктің және адалдықтың үлгісі болсын» деп қосты Сәденов.

Мереке қарсаңында еліміздің әр өңірінде салтанатты шара өтуде.

Еске салсақ, бүгін - 5 қазан күні Алматы облысында қаза тапқан сарбаздың туыстары Алматы қаласындағы орталық мәйітханадан оның денесін ала алмай отырғандарын айтып, президентке үндеу жолдады.