Екі аптадағы соғыс: Парсы шығанағындағы елдерге Иран шабуылдарының салдары қандай?

Иран мен оның қарсыластары арасындағы шиеленіс Парсы шығанағы аймағын жаңа әскери кезеңге алып келді. Екі апта ішінде Қатар, Оман, Біріккен Араб Әмірліктері, Кувейт, Бахрейн және Сауд Арабиясы жүздеген баллистикалық зымыран мен мыңдаған дрон шабуылына ұшырады. Негізгі соққылар мұнай инфрақұрылымы, әуежайлар мен өнеркәсіптік нысандарға бағытталған. Orda.kz тілшісі шолу жасады.

Қатар: ондаған ракета, бірақ құрбан жоқ

Қатарға жасалған шабуылдар ең қарқындылардың бірі саналады. Соғыс басталғалы ел аумағына 163 баллистикалық ракета және кемінде 72 дрон бағытталған. Қатардың әуе қорғаныс жүйелері олардың басым бөлігін – 118 зымыранды және 47 дронды атып түсірген. Сонымен қатар екі Су-24 жойғыш ұшағы жойылғаны хабарланды.

Ресми мәлімет бойынша, бұл шабуылдардан қаза тапқандар жоқ.

Оман: делдал елдің де аумағы қауіпсіз болмады

АҚШ пен Иран арасындағы келіссөздерде делдал болып жүрген Оман да шабуылдардан шет қалған жоқ. Елдің Сохар өңірі мен Әл-Авахи өнеркәсіптік аймағына дрондар шабуыл жасап, екі шетел азаматы қаза тапты, бірнеше адам жараланды.

Тағы бір дрон елдің солтүстігіндегі теңізге құлаған. Бұған дейін Оманның Салала портындағы мұнай қоймаларына шабуыл жасалғаннан кейін Иран президенті Масуд Пезешкиан Оман сұлтанымен телефон арқылы сөйлескен. Сұлтан Оманның бейтарап позициясын сақтайтынын, бірақ ел аумағына жасалған шабуылдарды айыптайтынын мәлімдеді.

БАӘ: ең ауыр шығын

Екі аптадағы соғыс салдарын ең көп сезінген елдердің бірі — Біріккен Араб Әмірліктері. Ресми мәлімет бойынша, шабуылдардан 6 адам қаза тауып, 141-ден астам адам жараланған. Әскери ведомствоның дерегінше, соғыс басталғалы бері БАӘ әуе қорғаныс жүйелері 285 баллистикалық зымыранды, 15 қанатты зымыранды, 1567 дронды атып түсірген.

Тек бір күннің өзінде 7 баллистикалық зымыран мен 27 дрон ұсталған.

Кувейт: жүздеген зымыран мен дрон бейтараптандырылды

Кувейт билігі де кейінгі екі аптада әуе шабуылдарының жиіленгенін хабарлады. Ресми деректерге сәйкес, 6 адам қаза тапқан, ондаған адам жараланған. Соғыс басталғалы Кувейт әуе қорғанысы 237 баллистикалық зымыран мен 445 дронды бейтараптандырған.

Соңғы күндердің өзінде тағы 11 дрон мен екі баллистикалық зымыран жойылған.

Бахрейн: бейбіт тұрғындар жараланды

Бахрейнде бір әйел қаза тауып, 32 адам жараланған. Олардың ішінде төрт кәмелетке толмаған бала, соның ішінде екі айлық сәби бар. Әскери мәліметтерге сәйкес, шабуылдар басталғалы ел аумағында 115 ракета мен 191 дрон атып түсірілген.

Сауд Арабиясы: мұнай кен орындары нысанаға алынды

Сауд Арабиясында шабуылдар көбіне мұнай инфрақұрылымына бағытталған. Ел билігінің дерегінше, 2 адам қаза тапқан, 12 адам жараланған. Тек кейінгі күндері Сауд әуе қорғанысы ондаған дронды жойған. Мысалы, жұма күні 53 дрон, ал сәрсенбіде 28 дрон тойтарылған.

Бұған дейін мұнайға бай Шайба кен орнына бағытталған баллистикалық ракета мен дрон шабуылдарының жолы кесілген.

Аймақ үшін салдары қандай?

Екі апта ішінде Парсы шығанағы елдері жүздеген зымыран мен мыңдаған дрон шабуылына тап болды. Көп жағдайда соққылар мұнай инфрақұрылымы мен авиация саласына бағытталған. Сарапшылардың айтуынша, бұл шабуылдар аймақтың энергетикалық қауіпсіздігіне ғана емес, әлемдік мұнай нарығына да әсер етуі мүмкін.

Оқи отырыңыз:

• «Өліп жақсы көремін»: Нетаньяхудың «өлімі» мен алты саусақтың құпиясы
• Қаласақ, қызық үшін тағы бірнеше соққы жасай аламыз — Трамп
• Трамп соғыста «алдын ала жеңіп жатырмыз» деді. Алайда шығын шаш етектен