Дженнифер Лопес Қазақстанға 400 млн теңге әкеледі – Үкімет

Үкімет танымал әнші Дженнифер Лопестің Астанадағы концертіне 15 мыңға жуық турист келіп, мемлекеттік бюджетке 400 миллион теңге көлемінде салық түсетініне сенімді, деп хабарлайды Orda.kz.

Америкалық әнші әрі актриса Дженнифер Лопес 1 тамызда «Астана Арена» стадионында өнер көрсетеді. «Астана Концерт» компаниясының продюсері Малик Хасенов бұл оқиғаны ел астанасының мәдени өміріндегі маңызды сәт деп атады.

Концерт коммерциялық негізде ұйымдастырылып, Астананы әлемдік А санатындағы жұлдыздардың гастрольдік картасына енгізеді.

«Шараға 15 мыңнан астам турист келеді деп күтілуде. Бұл ел экономикасына елеулі әсер етеді. HoReCa секторы шамамен 6,5 миллиард теңге пайда табады, ал салық түсімі 400 миллион теңгеден асады», – деді Хасенов.

Ұйымдастырушылар мұндай ауқымды концерттер Астананың мәдени және туристік тартымдылығын арттыруға жол ашатынына сенімді.

Премьер-министр Олжас Бектенов туризмнің экономикалық әлеуеті зор екенін және бұл сала ел дамуына тың серпін беруі тиіс екенін атап өтті.

«Қазақстанда туризмнің даму мүмкіндігі өте жоғары. Соңғы бес жылда туристер саны 7,5 есеге артты. Былтыр елімізге 15 миллионнан астам адам келді», – деді Бектенов.

Оның айтуынша, Қазақстан алдағы уақытта халықаралық іс-шаралар тұрақты өтетін елге айналуы керек. Үкімет бұл бағытта барлық қажетті қолдау көрсетуге дайын.